|
Bakıdakı Mikayıl Müşfiq adına 18 nömrəli tam orta
məktəbdə "Ümumtəhsil məktəb şagirdlərinin mütaliə
vərdişlərinin təkmilləşdirilməsi və onlarda mütaliə
mədəniyyətinin formalaşdırılması ilə bağlı tədbirlər
barədə" Azərbaycan Respublikası təhsil nazirinin əmrinə
müvafiq olaraq tez-tez tədbirlər keçirilir.
Bu günlərdə məktəbdə şairlər Musa Yaqub, Ramiz
Qusarçaylı və bədii qiraət ustası, əməkdar artist Ağalar
Bayramovla keçirilən görüş də həmin silsilədən növbəti
tədbir idi. "Biliyə aparan yeganə yol mütaliədir"
mövzusunda tədbiri məktəbin direktoru Səkinə Məmmədova
açaraq qonaqları salamladı və dəvətlərini qəbul edib
görüşə təşrif buyurduqlarına görə onlara pedaqoji
kollektiv adından minnətdarlığını bildirdi. Qeyd etdi
ki, ötən həftə məktəbdə "Nağıllar dünyası" adlı rəsm
sərgisi də keçirilib. Həmin sərgi şagirdlərdə mütaliəyə
maraq oyatmaqla yanaşı onlarda nağıl qəhrəmanlarını
təsvir etmək bacarıqlarını da üzə çıxarıb. Şagirdlər
nağıl personajlarının maketlərini hazırlayıb nümayiş
etdiriblər. Əl işləri bəyənilən şagirdlər diplomlarla
mükafatlandırılıb.
Sonra tədbirin aparıcısı, məktəbin dil-ədəbiyyat
müəllimi Aynur Mustafayeva Musa Yaqubun yaradıcılığı
barədə ətraflı məlumat verdi. Qeyd etdi ki, "Təbiət
şairi" adlandırılan Musa Yaqub təbiətlə bağlı olan,
təbiətin füsunkarlığından məftun qalan bir lirik şairdir.
Qiraət ustası Ağalar Bayramov şairlərin bir neçə şeirini
ifa edərək iştirakçılarda xoş ovqat yaratdı.
Sonda söz Musa Yaquba verildi. O, məktəblə bağlı
xatirələrini iştirakçılarla bölüşdü və bir neçə şeirini
söylədi. Şagirdlərin ifasında şairin "Təbiət mənimlə
danışır" və başqa şeirləri səsləndirildi. Məktəbin
tarix müəllimi Bəsti Ağayeva da şairin "Bu dünyanın
qara daşı göyərməz" şeirini özünəməxsus ustalıqla ifa
etdi.
Yaradıcılığında vətənpərvərlik mövzusuna yer ayıran şair
Ramiz Qusarçaylı da görüş zamanı seçmə şeirlərindən bəzi
nümunələri öz ifasında təqdim etdi.
Xoş əhvali-ruhiyyə ilə başlanan tədbir həmin notlarla
da sona yetdi.
Sifai SƏFƏROVA,
"Azərbaycan müəllimi" |
