|
Qazaxda xalq yazıçısı Yusif Səmədoğlunun anadan
olmasının 80 illik yubileyi qeyd edilib. Azərbaycan
Dövlət Pedaqoji Universitetinin Qazax filialından daxil
olan məlumatda bildirilir ki, Ədəbiyyat Muzeyində
keçirilən tədbirdə əvvəlcə yazıçının həyat və
yaradıcılığından bəhs edən videoçarx nümayiş olunub.
AYB Qazax zona filialının sədri, əməkdar incəsənət
xadimi, şair Barat Vüsal yubiley tədbirini açaraq qeyd
edib ki, xalq yazıçısı Yusif Səmədoğlu həyatı boyu həm
ədəbi, həm də ictimai-siyasi fəaliyyətində
azərbaycançılıq mövqeyini nümayiş etdirib. Y.Səmədoğlu
XX əsr Azərbaycan ədəbiyyatı tarixində özünəməxsus yer
tutaraq, həyata, gerçəkliyə fərqli münasibəti,
dünyagörüşü ilə seçilib. Milli-mənəvi dəyərlərimizin
qorunub saxlanılması, milli mədəniyyətin, milli əxlaqın
gənc nəslə çatdırılması baxımından onun əsərlərinin
dəyəri çox böyükdür.
Gənc şair Taleh Mansur çıxışında bildirib ki,
Y.Səmədoğlu yaradıcılığında Vətən sevgisi güclü olub və
onun əsərləri azərbaycançılıq ideyası əsasında
qurulduğundan hər dövr üçün aktualdır.
Azərbaycan Dövlət Pedaqoji Universitetinin Qazax
filialının tələbələri Şəfəq Məmmədova və Kübra Əhmədli
Y.Səmədoğlunun yaradıcılığından danışıblar.
Tədbirdə Qazax Dövlət Dram Teatrı aktyorlarının
ifasında xalq yazıçısının səhnələşdirilmiş əsərindən bir
parça təqdim olunub. |
