Heydər Əliyev təhsil haqqında 

-  Təhsil hər bir dövlətin, ölkənin, cəmiyyətin həyatının, fəaliyyətinin mühüm bir sahəsidir.

-  Təhsilimizin məqsədi gənc nəslə, uşaqlara təhsil verib onları gələcəyə hazırlamaqdır. Hər bir insan gərək eyni zamanda vətəndaş olsun. Mütləq vətəndaş olsun. Dövlətinə sadiq, millətinə sadiq, ənənələrinə sadiq, xalqına sadiq vətəndaş olsun.

-  Bizdə təhsil çox inkişaf edibdir. Azərbaycanda, demək olar ki, təhsil almayan adam yoxdur.

-  Bir müstəqil dövlət olaraq özümüzün təhsil sistemimizi istədiyimiz kimi qururuq. İndiyə qədər yaranmış təməlin üzərində Azərbaycan təhsili, məktəbi bundan sonra daha da təkmilləşəcəkdir.

-  İndi dərs alan uşaqlar, gənclər gərək mütləq və mütləq bizim yeni dərsliklər əsasında oxusunlar.

-  Milli ideologiyamızı hər yerdə tətbiq etmək üçün məktəblərdə Azərbaycan xalqının tarixinin tədrisinə çox ciddi fikir vermək lazımdır... Gənclərimiz öz tarixini, öz tarixi keçmişini gərək yaxşı bilsinlər. çünki mənəviyyatımız, gənclərin bugünkü və gələcək mənəviyyatı bununla bağlıdır.

-  Azərbaycanın ali məktəblərinin, təhsil sisteminin səviyyəsini qaldırmalıyıq. Eyni zamanda dünyanın inkişaf etmiş ölkələrinin, yüksək səviyyəli universitetlərin, institutların imkanlarından Azərbaycanın gələcəyi, dəyərli kadrlar hazırlanması üçün bundan sonra da səmərəli istifadə etməliyik.

-  Həyat böyük bir prosesdir. Bu prosesdə uğurla iştirak etmək üçün insan müasir tələblərə uyğun olan təhsilə  malik olmalıdır. Təhsil də daim təkmilləşdirilməlidir. Bütün bunlar Azərbaycanın təhsil işçilərinin üzərinə düşən vəzifələrdir.

-  Təhsil sistemi Azərbaycanın gələcəyini təmin edən bir sistemdir. Hər bir millətin, hər bir ölkənin gələcəyi gənclərdir. Biz gənclərimizi nə qədər yüksək təhsilli etsək, həqiqi yüksək təhsilli etsək, onların müəyyən ixtisaslara mükəmməl yiyələnməsinə şərait yarada bilsək, müstəqil Azərbaycanın gələcəyi və demək, müstəqil Azərbaycanın iqtisadiyyatının inkişafı, elminin inkişafı, təhsilinin inkişafı, insanların rifah halı o qədər də yaxşı olacaqdır. 

Dünya siyasətçiləri Heydər Əliyev haqqında 

Uzun illər ərzində Heydər Əlirza oğlu Əliyevin səmərəli fəaliyyəti xalqlarımızın ümumi tarixi ilə bilavasitə bağlı olmuşdur. O, Rusiya və Azərbaycanın strateji tərəfdaşlığının təməlini qoymuş, dostluğumuzun və qarşılıqlı anlaşmamızın möhkəmlənməsinə böyük şəxsi töhfə vermişdir. 

Vladimir PUTİN,
Rusiya Federasiyasının keçmiş Prezidenti 

   Mərhum Heydər Əliyevin müdrik və uzaqgörən idarəçiliyi sayəsində Azərbaycan bu gün xarici siyasətində etibar və sabitlik amili kimi çıxış edən, iqtisadi inkişaf və sosial rifah yolunda möhkəm addımlarla irəliləyən, beynəlxalq birliyin nüfuzlu bir üzvü kimi etibarlı mövqeyini gündən-günə təmin etməkdə olan ölkədir. Azərbaycanın bu gün yürütdüyü uğurlu və tarazlaşdırılmış xarici siyasətinin memarı olan Heydər Əliyevi itirməyimiz tarixi və mədəni tellərlə bir-birinə bağlanmış olan xalqlarımızı dərindən kədərləndirmişdir.  

Abdullah GüL,
Türkiyə Respublikasının Prezidenti 

Heydər Əliyev Cənubi Qafqazda uzun müddət ərzində ən əsas şəxsiyyət olmuşdur. Bu günlərdə Amerika Birləşmiş Ştatları və Azərbaycanın bəhrələndiyi dostluq əlaqələrinin qurulmasında və Azərbaycanın müstəqilliyinin qorunmasında onun şəxsi səyləri həyati əhəmiyyət daşımışdır. Məhz onun rəhbərliyi altında Amerika Birləşmiş Ştatları və Azərbaycan, Əfqanıstan və İraqdakı əməliyyatlar da daxil olmaqla, terrorizmə qarşı mübarizədə tərəfdaş olmuşlar. Dağlıq Qarabağ faciəsinin sülh danışıqları vasitəsilə ədalətli və uzunmüddətli həllinə nail olmaq sahəsində onun nümayiş etdirdiyi qətiyyət regionda sülh və sabitliyin saxlanmasında mühüm əhəmiyyət kəsb etmişdir. 

Corc BUŞ,
Amerika Birləşmiş Ştatlarının keçmiş Prezidenti 

Bu qeyri-adi şəxsiyyət Azərbaycanı çiçəklənmə yoluna gətirib çıxarmışdır. Müxtəlif görüşlərimiz zamanı, xüsusilə Dağlıq Qarabağ münaqişəsi ətrafında müzakirələr apararkən, münaqişənin sülh yolu ilə həllində onun cəsarətini, müdrikliyini və qətiyyətini yüksək qiymətləndirdim.  

Jak ŞİRAK,
Fransa Respublikasının keçmiş Prezidenti 

Tanrının xalqımıza ən böyük töhfəsi 

Ümummilli lider Heydər Əliyev Azərbaycan xalqına Uca Tanrı tərəfindən bəxş edilmiş töhfə, paydır.

Heydər Əliyev dünya siyasətində Günəşdir. Böyük şəxsiyyətdir. Onun müdrik siyasəti yaşayır və müstəqil Azərbaycanın parlaq gələcəyinə işıq salır.

Günbəgün çiçəklənən Vətənimizin hər bir guşəsində ulu öndərin izi görünür, əməlləri yaşayır. Xalqının qarşısında xilaskarlıq missiyasını şərəflə yerinə yetirən Heydər Əliyev bütün Azərbaycanı qarış-qarış gəzirdi. Yaddaşımızda dərin iz salan bir tarixi hadisəni böyük sevinc və iftixar hissilə həmişə xatırlayıram. 1973-cü ilin sentyabrında Heydər Əliyev Ağdam rayonunun Qaradağlı kəndinə gəldi. Tarlaları gəzdikdən sonra camaatla görüşdü.

Sosialist əməyi qəhrəmanları Sürəyya Kərimova, Turab Məmmədov və mənim anam - Sosialist Əməyi Qəhrəmanı Səkinə İmanova ilə çox səmimi söhbət etdi. Həmin günün xatirəsi mənim qəlbimdə əbədidir.

Bu gün ulu öndər Heydər Əliyevin bizim xalqımız üçün etdiklərini hamımız və bütün dünya görür və anlayır. O, bütün mənalı həyatını Azərbaycan xalqının rifahına sərf etmişdir. Ata yolunun layiqli davamçısı, ölkə Prezidenti İlham Əliyev haqlı olaraq, daha doğrusu, hamının qəlbini oxuyaraq demişdir:

"Heydər Əliyev bütün dünyaya lazımdır".

Hər il Azərbaycan xalqının ümummilli lideri Heydər Əliyevin anadan olmasının ildönümü böyük təntənə ilə qeyd olunur.

Heydər Əliyev xalq üçün yaranmışdı, xalq üçün də yaşadı...

Bəli, müstəqil Azərbaycanımız Heydər Əliyevin şah əsəridir. O, Azərbaycanı qurdu, yaratdı. Heydər Əliyev bu quruculuqda öz həyatını əsirgəmədi.

Dünya şöhrətli siyasi xadim, türk dünyasının böyük oğlu Heydər Əliyevin ölməz ideyaları bu gün xalqımızın başı üstündə bir həqiqət və azadlıq Günəşi kimi nur saçır, ürəklərə hərarət, gözlərə işıq verir.

Mən Ağdam rayonunun üç kənd orta məktəbində Azərbaycan dili və ədəbiyyat müəllimi işləyirəm. Uzun illərdir ki, tədris prosesində dilimizin, ədəbiyyatımızın təntənəsində ulu öndərimiz, böyük insan Heydər Əliyevin rolunu, titanik fəaliyyətini həmişə ön plana çəkirəm.

Bütün xalqımız kimi, mən də ümummilli liderimiz Heydər Əliyevə çox yüksək hörmət və ehtiram bəsləyir, şagirdlərimi onun nümunəsində tərbiyə etməyə çalışıram. 

Sahib İMANOV,
Ağdam rayonunun Qaradağlı
kənd orta məktəbinin dil-ədəbiyyat müəllimi

Milli təhsilimizin himayədarı 

Naxçıvan Dövlət Universitetində fəaliyyət göstərən Heydər Əliyev Universitetinin "Heydər Əliyev və Azərbaycan təhsili" mövzusunda 130-cu məşğələsi keçirilmişdir. ümummilli liderin anım günü ərəfəsinə təsadüf edən məşğələdə öncə dahi öndərin xatirəsi bir dəqiqəlik sükutla yad edilmişdir. Tədbiri giriş sözü ilə açan rektor, akademik İsa Həbibbəyli Heydər Əliyevin Azərbaycan təhsilinin inkişafındakı misilsiz xidmətlərindən bəhs etmişdir. Millət vəkili ulu öndərin hər iki hakimiyyəti dövründə Azərbaycanda aparılan təhsil quruculuğundan, regionda təhsilin inkişafına göstərilən qayğıdan ətraflı söz açmışdır. Rektor Heydər Əliyevin milli təhsilin tərəqqisi və  dünyaya inteqrasiyası istiqamətindəki məqsədyönlü fəaliyyətinin  bu gün ölkə başçısı İlham Əliyev tərəfindən uğurla davam etdirildiyini vurğulamışdır.

Sonra NDU-nun Pedaqogika və psixologiya kafedrasının dosenti, pedaqoji elmlər namizədi, Azərbaycan Respublikasının əməkdar müəllimi Kamal Camalovun mövzu üzrə məruzəsi dinlənilmişdir. Məruzədə Heydər Əliyevin müxtəlif ali və orta ixtisas məktəblərinin yaradılmasına və formalaşmasına, gənclərin keçmiş SSRİ-nin ən məşhur ali təhsil ocaqlarında oxumalarına göstərdiyi diqqət və qayğıdan, təhsil işçilərinin əməyini dəfələrlə yüksək qiymətləndirməsindən danışılmışdır. Natiq ümummilli liderin Naxçıvan Dövlət Universiteti ilə sıx əlaqələrindən, muxtar respublikanın bu yeganə dövlət ali məktəbinin inkişafındakı rolundan bəhs edərək gəncliyi ümummilli liderin həyatından və siyasi irsindən daim bəhrələnməyə, onun ideyalarına sadiq qalmağa çağırmışdır. 

Mehriban SULTAN,
NDU-nun Mətbuat şöbəsinin müdiri  

Həyatını xalqına həsr etmiş insan 

Dekabrın 10-da Azərbaycan Dillər Universitetinin Heydər Əliyev muzey lektoriyasında Azərbaycan xalqının ümummilli lideri  Heydər  Əliyevin hakimiyyətə gəlməsinin 40 illiyinə həsr olunmuş "Həyatını xalqına həsr etmiş insan" mövzusunda  elmi-praktik  konfrans  keçirildi. Tədbirdən öncə  qonaqlar ümummilli lider Heydər Əliyevin xatirəsini ehtiramla yad edərək universitetdəki büstü qarşısına gül dəstələri qoydular. Tədbirdə ADU-nun rektoru, professor Səməd Seyidov "Heydər  Əliyev və Azərbaycan diplomatiyası" mövzusunda çıxış etdi. Sonra təhsil nazirinin müavini İradə Hüseynova çıxış edərək bildirdi ki, ulu öndər Heydər Əliyevin  Azərbaycanda  hakimiyyətə gəlməsindən  40 il  vaxt keçir. Dərin zəka sahibi və müdrik insan olan Heydər Əliyev müstəqil Azərbaycanın qurucusudur.Yaşadığı və işlədiyi dövrlərdə  həyatını həmişə Azərbaycanın  inkişafına həsr etmişdir. Bugünkü gənclərin  xarici  dövlətlərdə  təhsil  almaları  və  onların hərtərəfli inkişaf etmələri onun  zəhmətinin bəhrəsidir.

Konfransda YAP Nəsimi Rayon Təşkilatının sədri, millət vəkili M.Həsənova, ADU-nun Gənclər Təşkilatının sədri Ş.İsmayılov və başqaları da ulu öndər Heydər Əliyevin misilsiz xidmətlərindən danışdılar. 

Şakir CƏFƏROV  

Ulu öndərin xatirəsinə həsr olunmuş ədəbi-bədii gecə

 Xalqımızın böyük oğlu, müstəqil Azərbaycanımızın qurucusu, dünya şöhrətli şəxsiyyət, ümummilli liderimiz Heydər Əliyevin əziz xatirəsi bütün xalqımız kimi, məktəbimizin müəllim və şagirdlərinin də qəlbində daim yaşayır və həmişə böyük sayğı ilə yad olunur. Bakı şəhəri 111 nömrəli məktəbdə bu günlərdə böyük öndərin əziz xatirəsinə həsr olunmuş "Odlar yurdu - Heydər Əliyev - Azərbaycan" mövzusunda ədəbi-bədii gecə keçirildi. Gecənin təşəbbüskarı məktəbimizin məzunu, yüksək balla Azərbaycan Respublikasının Prezidenti yanında Dövlət İdarəçilik Akademiyasına daxil olmuş Ayşən Quliyeva idi.

Tədbirdə vurğulandı ki, xatirəsi bütün xalqımız tərəfindən dərin ehtiramla anılan Heydər Əliyevin həyat və fəaliyyəti, müstəqilliyimizin möhkəmləndirilməsi, vətənimizin və xalqımızın daha da inkişaf etməsi yolundakı misilsiz xidmətləri və müdrik şəxsiyyəti gənclər üçün böyük bir nümunə, əsl vətəndaşlıq məktəbidir.

Məktəbin direktoru Jalə Hacıyeva ulu öndər Heydər Əliyevin milli mənəviyyatımızın, mədəniyyətimizin qorunması və inkişafı üçün gördüyü işləri yüksək qiymətləndirdi. Gənclərə həmişə bu dahi İnsandan nümunə götürməyi, onun ölməz ideyalarını, arzu və əməllərini yaşatmağı tövsiyə etdi.

DİA-nın tələbələri Tamerlan Dəmirbəyli, Leyla Sultanlı, Ləman Xəlilova, BDU-nun tələbəsi Sevinc Əhmədova, 111 nömrəli məktəbin fəal şagirdlərindən Sevinc Mustafayeva və başqaları çıxış edərək böyük öndərin tələbələrə, şagirdlərə göstərdiyi qayğıdan, təhsilə verdiyi yüksək qiymətdən danışdılar, ona olan ehtiramlarını izhar etdilər.

Məktəbin VII sinif şagirdi Emil Cəfərov Heydər Əliyevə həsr olunmuş şeir söylədi.

Ədəbi-bədii gecənin sonunda məktəbimizin daha bir məzunu, Azərbaycan Dövlət İqtisad Universitetinin III kurs tələbəsi Abdulla Piriyevin dahi şəxsiyyətin həyat və fəaliyyətindən bəhs edən 30-35 dəqiqəlik filmi nümayiş olundu.  

Qıztamam QULİYEVA,
Bakıdakı 111 nömrəli orta
məktəbin ingilis dili müəllimi