2010-2011-ci dərs ilinə hazırlıqla  əlaqədar İsmayıllı rayonunda xeyli işlər görülmüşdür. Belə ki, Qaraqaya kəndində inşa edilən məktəb binasında son tamamlama işləri gedir. Obyektin sentyabrın 15-də istifadəyə veriləcəyi nəzərdə tutulur.

Aşıqbayram kənd orta məktəbi əsaslı təmir edilir. Tircan, Uştal kənd orta və Xanagah kənd əsas məktəblərinin istilik sistemi isə yenidən qurulur.

Şəhər 5 nömrəli, Qubaxəlilli, Ruşan kənd orta, Xanagah, Bizlan kənd əsas, Maçaxı kənd ibtidai məktəblərində, şəhər 3 nömrəli və İsmayıllı kənd körpələr evi-uşaq bağçalarında və şahmat məktəbində əsaslı, digər bütün məktəb və bağçalarda cari təmir işləri aparılır.

Rayonun məktəblərini dərsliklə tam təmin etmək məqsədilə 24.000 dərslik gətirilmiş və paylanılmışdır.

Yeni dərs ilində I siniflərdə dərs deyəcək 80 nəfər ibtidai sinif müəllimi üçün kurikulumla bağlı 2-7 avqust tarixində birhəftəlik treninqlər keçirilmişdir.

***

Xaçmaz rayonunda təhsilin inkişafı, tədris müəssisələrinin maddi-texniki bazasının möhkəmləndirilməsi, məktəblərin ixtisaslı müəllimlərlə tam təminatı və yeni məktəblərin tikintisi hər il olduğu kimi bu tədris ilində də davam etdirilir.

Buna əyani sübut olaraq yararsız vəziyyətdə olan Xaçmaz şəhər M.Məhəmmədov adına 4 nömrəli əsas məktəb sökülərək, yerində Dövlət Proqramı çərçivəsində müasir standartlara cavab verən 640 yerlik yeni məktəb binası tikilmişdir. Hazırda son tamamlama işləri aparılır.

Həmçinin rayonda daxili imkanlar hesabına ikimərtəbəli müasir tipli şahmat məktəbi tikilib, yeni tədris ilində şahmatsevərlərin istifadəsinə veriləcəkdir.

Bundan əlavə, Xaçmaz şəhər M.Babayev adına 1 nömrəli orta, Xudat şəhər K.Məhərrəmov adına 3 nömrəli orta məktəblərin binalarının fasad hissələri təmir olunmuş, Xaçmaz şəhər C.Cabbarlı adına 6 nömrəli orta məktəbin istilik sistemi yenidən qurulmuş, Xaçmaz şəhər Ç.Abdullayev adına 2 nömrəli orta məktəb isə əsaslı təmir edilmişdir.

***

"Mədəd" HTİB-nin təşkilatçılığı ilə İKT (İnformasiya-kommunikasiya texnologiyaları) üzrə birhəftəlik kurslarda rayonun 620 müəllimi iştirak edib və müvafiq sənəd alıb.

Hər il olduğu kimi, bu il də fənn kurikulumlarının tətbiqi ilə bağlı sinif müəllimləri üçün təşkil olunmuş kurs iyul ayının 12-dən 23-nə qədər akademik Z.Əliyeva adına Xaçmaz şəhər 3 nömrəli orta məktəbdə aparılmışdır. Müasir Təhsil və Tədrisə Yardım Mərkəzi tərəfindən həyata keçirilən bu kurslarda 226 müəllim iştirak etmiş və sertifikatlar almışdır.

Nizami MİRZƏ