Bakı Dövlət Universitetinin rektoru, millət vəkili, akademik Abel Məhərrəmov Fransa Dövlət Şərq Dilləri və Mədəniyyətləri İnstitutunun (İNALCO) rektoru, professor Jak Löqranı qəbul edib. Qonağı salamlayan rektor BDU haqqında məlumat verib, əsasən onun beynəlxalq əlaqələrindən danışıb.

Professor Jak Löqran da öz növbəsində rektoru olduğu institutdan bəhs edib. Qeyd edilib ki, Fransa Dövlət Şərq Dilləri və Mədəniyyətləri İnstitutunda 96 dil, o cümlədən 1999-cu ildən Azərbaycan dili tədris olunur. İnstitutun bir neçə fakültəsində Azərbaycan dilinin tədrisin tərkib hissəsinə çevrildiyindən danışan J.Löqran bildirib ki, rəsmi diplom təsis olunandan sonra tələbələr Azərbaycan dilini ayrıca kurslarda öyrənmək və bu sahə üzrə diplom almaq imkanı əldə ediblər. 2008-ci il noyabrın 7-də isə bu təhsil ocağında Azərbaycan dili fakültəsi açılıb. Dilimizin daha səmərəli tədrisində maraqlı olduğunu söyləyən Jak Löqran BDU ilə məhz bu baxımdan əməkdaşlığa önəm verdiyini bildirib.

Akademik Abel Məhərrəmov həmkarının fikirlərini təqdir edib və BDU-da fransız dili ilə yanaşı, artıq 3 ildir ki, fransız ədəbiyyatının da tədris olunduğunu bildirib. Sonda qərara alınıb ki, Fransa Dövlət Şərq Dilləri və Mədəniyyətləri İnstitutunda Azərbaycan dilinin, BDU-da isə fransız dili və ədəbiyyatının daha səmərəli keçilməsi üçün mütəxəssis mübadiləsi edilsin.

Azərbaycanın Fransadakı səfiri Elçin Əmirbəyov Bakı Dövlət Universitetinin təhsil və elmimizdə böyük rol oynadığını deyərək, Fransada Azərbaycan dilinin tədrisi üçün vəsait çatışmazlığına toxunub və BDU-dan tədris vəsaiti, Azərbaycan-fransızca lüğət, o cümlədən dilin öyrənilməsi üçün disklər və digər mümkün vəsaitlər verilməsini xahiş edib. İkitərəfli görüşdən sonra qonaq universitetlə tanış olub, imtahanların elektron test üsulu ilə keçirilməsi prosesi ilə maraqlanıb. Distant Tədris Mərkəzi vasitəsilə əlaqələrin mümkünlüyü barədə də fikir mübadiləsi edilib.

Pərvanə İBRAHİMOVA