Haqqında söhbət açacağım müəllim, məktəbşünas, bacarıqlı təşkilatçı Soltanağa Cəfərovun peşəkarlıq və insanlıq cəhətlərini önə çəkərək onu tanıyanların mühakiməsinə verirəm. 

Soltanağa müəllim Masallının Xoşçobanlı kəndində anadan olub. Azərbaycan Dövlət Pedaqoji Universitetinin coğrafiya fakültəsini bitirib. Orta məktəbdə coğrafiya müəllimi, 23 il məktəb direktoru işləyib, ordu sıralarında zabit kimi xidmət edib. Soltanağa müəllimin ilk müəllimlik illərini xatırlayanlar deyirlər ki, o, məktəbə əsl müəllimlik "ab-havası" gətirmişdi. Şagirdlərinə qarşı dərin sevgi və böyük tələbkarlıq münasibətində olan, fənninin tədrisinə istedadlı pedaqoq, yaradıcı və tədqiqatçı müəllim kimi yanaşan Soltanağa müəllim hələ o vaxtlar bu günün nəbzini tuta bilmişdi: - "Şagirdlərimizə yalnız bərabərhüquqlu yoldaş, əsl mənada şəxsiyyət kimi baxmaqla onları istədiyimiz səviyyədə tərbiyə edə bilərik". Məhz bu yanaşmanın nəticəsi idi ki, Soltanağa müəllimin şagirdlərindən çoxu ali məktəblərə qəbul olurdu, onlarca yetirməsi isə bilavasitə onun yolunu seçirdi. Müxtəlif səviyyəli bilik yarışlarında, olimpiadalarda S.Cəfərovun yetirmələrinin qazandığı uğurlar rayon təhsili üçün mənəvi örnəkdir. Sığıncaq kənd orta məktəbinin direktoru olarkən Soltanağa müəllimin yorulmaz fəaliyyəti nəticəsində yararsız vəziyyətdə olan məktəb binası yay tətili ərzində yenidən tikilib istifadəyə verildi. Kənd ictimaiyyəti həmin hadisəni indi də yaxşı xatırlayır.

1993-cü ildə S.Cəfərov Masallı RTŞ-a dəvət olunur. O, coğrafiya fənni üzrə metodist vəzifəsində işə başlayır. Rayonun coğrafiya müəllimlərinin əlaqəli işini qurmaqla çox şeyə nail olur, tədrisin səviyyəsi yüksəlir.

Rayondakı  istedadlı  şagirdlərin  bir  mərkəzdə  birləşmələri,  daha  yüksək  təhsil göstəriciləri  qazanmaq  məqsədi  ilə  o,  1997-ci  ildə  bir qrup məsləkdaşı ilə birlikdə "Dəfinə" məktəb-liseyin yaradılmasına nail olur və həmin liseydə coğrafiya fənnini tədris edir.

2007-ci ildə Masallı RTŞ-da Soltanağa müəllim böyük məsləhətçi vəzifəsinə təyin olundu. Məktəbşünaslığı əla bilən S.Cəfərov mövcud problemlərin aradan qaldırılması, təhsil prosesinin düzgün məcraya yönəldilməsi üçün peşəkarlığını əsirgəmədi. Bunu rayonun pedaqoji ictimaiyyətinin Soltanağa müəllimə olan hörmət və sevgisi də sübut edir.

S.Cəfərov yaradıcı müəllimdir. Respublika pedaqoji mühazirələrində, "İlin müəllimi" müsabiqələrinin respublika turunda qazandığı diplomlar müəllimin metodiki ustalığının sübutudur. Onun müxtəlif illərdə "Coğrafiyadan testlər", "Coğrafiyadan riyazi hesablamalar", "Azərbaycan Respublikasının coğrafiyasından testlər" adlı kitabları coğrafiya müəllimlərinin, abituriyentlərin, bu elmə marağı olanların stolüstü kitablarına çevrilmişdir.

Mehriban ailə başçısı olan Soltanağa Cəfərovun övladlarının dördü də müəllimlik sənətini seçib. Oğlanları Famil və Fərəc isə bilavasitə atalarının davamçısıdır. 

Əlinaz TALIBOV,
Masallı rayonunun Yeddioymaq kənd
1 nömrəli orta məktəbinin riyaziyyat müəllimi,
əməkdar müəllim