2 fevral - Gənclər Günü münasibətilə Media Mərkəzində "SOS Uşaq Kəndləri-Azərbaycan" Assosiasiyası "Gələcək bizimdir" adlı tədbir keçirmişdir.

Tədbirdə çıxış edən assosiasiyanın milli direktoru Gülarə Hümbətova bildirmişdir ki, biz valideyn himayəsindən məhrum olmuş uşaqların irqindən, milliyyətindən və dinindən asılı olmayaraq qayğısına qalır, onların isti ailə mühitində böyümələrini təmin edirik. Bizim əsas məqsədimiz həmin uşaqları müstəqil həyata hazırlamaqdır.

Gənclərin hərtərəfli inkişafından, onlara göstərilən diqqət və qayğıdan danışan natiq vurğulamışdır ki, burada yaşayan gənclərin işlə təminatı daim diqqət mərkəzindədir. Bu istiqamətdə bir çox mühüm layihələr həyata keçirilir, yaxın vaxtlarda onların yaşayış şəraitini təmin edəcək "Gənclər evi"nin açılışı nəzərdə tutulur.

Tədbirdə SOS Uşaq Kəndlərinin "Gənclər evi"ndən, "Ailələrə dəstək" sosial layihəsindən və 257 nömrəli məktəbdə təhsil alan bir qrup gəncin "Gələcək bizik" şüarı altında çəkdikləri qısa videoçarxlardan danışılmışdır.

Mərasimdə gənclər tərəfindən çəkilmiş 4 qısa videoçarx nümayiş etdirilmiş, bu görüntülərdə gənclərin sosial problemləri və onların həlli yolları göstərilmişdir.

Sonda "Gələcək bizik" layihəsində fəal iştirak edən bir qrup fəal gəncə diplom və Fəxri fərman təqdim edilmişdir.

 AzərTAc