Xəbər verildiyi kimi, Təhsil Problemləri İnstitutunda ayda bir dəfə ölkənin təhsil sistemində aparılan islahatlara, xüsusən də institutun Kurikulum Mərkəzində fənn kurikulumlarının hazırlanması və tətbiqi ilə bağlı görülən işlərə həsr olunmuş respublika seminarı keçirilir.

Fevralın 24-də həmin silsilədən təşkil edilən növbəti məşğələdə "Təlim prosesi: ənənəvi və müasir yanaşmalar" mövzusu müzakirə olundu. keçirilən seminarda Təhsil Problemləri İnstitutunun rəhbərliyi və əməkdaşları, kurikulum və qiymətləndirmə üzrə mütəxəssislər, paytaxtın və bölgələrin ümumtəhsil məktəblərində fəaliyyət göstərən ibtidai sinif müəllimləri iştirak edirdilər.

Azərbaycan Respublikası Təhsil Nazirliyinin Kənd rayonları üzrə ümumi təhsil şöbəsinin müdiri, kurikulum islahatı üzrə alt-komponent koordinatoru Aydın Əhmədov tədbir iştirakçılarına müzakirə olunacaq məsələ ilə bağlı məlumat verdi. Sonra "Təlim prosesi: ənənəvi və müasir yanaşmalar" mövzusunda təqdimatla çıxış etmək üçün söz pedaqoji elmlər doktoru, professor Akif Abbasova verildi. Məruzə-təqdimatda öncə ölkədə həyata keçirilən təhsil islahatları və pedaqoji prosesin yenidən qurulmasından, bu islahatları, zərurətə çevirən başlıca səbəblərdən bəhs olundu.

Pedaqoji prosesin təşkili prinsiplərindən (Milli Kurikulumda) söz açan natiq söylədi ki, bu mənada təhsil, təlim, tərbiyə, inkişaf və formalaşma proseslərinin məcmusu anlaşılır. Hər bir dərs təşkilati, məntiqi və psixoloji cəhətdən tam olmalıdır.

Daha sonra məruzədə əsas pedaqoji anlayış olan təlimin mahiyyəti və məzmunundan danışıldı, təlim prosesinin təşkili haqqında fikirlər tədbir iştirakçılarının diqqətinə çatdırıldı.

Qeyd olundu ki, təlimin məzmunu dedikdə, şagirdlərin ayrı-ayrı dərslərdə yiyələnməli olduğu bilik, bacarıq və vərdişlərin həcmi və xarakteri nəzərdə tutulur. Təhsilin məzmunu təlim prosesinin komponentlərindəndir. Məktəbdə və digər təlim-tərbiyə müəssisələrində təhsilin məzmunu kurikulumlar, təhsil standartları, dövlət tədris planları, öyrənilən fənlər üzrə tədris proqramları və dərsliklərlə müəyyən olunur. Son zamanlar ənənəvi və müasir təlim anlayışlarının müzakirə obyektinə çevrildiyini vurğulayan məruzəçi bildirdi ki, bu yalnız son dövrlərin problemi deyil. XX əsrin müxtəlif dövrlərində də, gələcəkdə də müasir dərs, təlimin prinsip və metodlarına müraciət etmək mühüm tələb olub və olacaq. Bu problem bütün dövrlərdə ortaya atılıb.

Sonra A.Abbasov hər iki təlimin müqayisəli təhlilini apardı, fəal təlimin xüsusiyyətləri, metodları haqqında ətraflı məlumat verdi, ənənəvi və fəal dərslərin quruluşunu, standart və qeyri-standart dərslərin əsas xüsusiyyətlərini diqqətə çatdırdı.

Təqdimat-məruzə başa çatdıqdan sonra Aydın Əhmədov seminar iştirakçılarını mövzu ətrafında geniş müzakirəyə dəvət etdi.

Bakıdakı 115 nömrəli məktəbin müəllimi Xuraman Əmircanova, 5 nömrəli məktəbin müəllimləri Sevinc Rzayeva, Almaz Bayramova, 164 nömrəli məktəbin müəllimləri Turan Hüseynova, Arzu Quluzadə, 58 nömrəli məktəbin direktoru Ulduzxan Abdullayev, 28 nömrəli məktəbin müəllimi Tünzalə Rzayeva, Təhsil Problemləri İnstitutunun əməkdaşı, psixologiya elmləri namizədi Limunəd Əmrahlı və başqaları müzakirə olunan mövzu ilə bağlı rəy və mülahizələrini söylədilər, bir sıra təkliflərini səsləndirdilər.

Təhsil Nazirliyinin şöbə müdiri Aydın Əhmədov, Dərslikləri Qiymətləndirmə Şurasının sədri Elmina Kazımzadə, Kurikulum Mərkəzinin direktoru Ənvər Abbasov, pedaqoji elmlər doktoru, professor Yəhya Kərimov və Təhsil Problemləri İnstitutunun direktoru Abdulla Mehrabov tədbir iştirakçılarının müxtəlif məsələlərlə bağlı suallarını cavablandırdılar və səslənən təkliflərə münasibətlərini bildirdilər.

Hicran ƏKBƏROVA