Aprelin 6-da Azərbaycan-Türkiyə özəl liseyləri baş idarəsində ekologiya və təbiəti mühafizə problemlərinə həsr olunmuş ənənəvi Ətraf Mühitin Mühafizəsi 4-cü Beynəlxalq Layihə Olimpiadası (İNEPO-EUROASİA) ilə bağlı mətbuat konfransı keçirildi.

Tədbirdə təşkilat komitəsinin sədri Arif Gömleksiz olimpiadanın keçirilməsi haqqında məlumat verdi. Bildirildi ki, olimpiada 2010-cu ilin Azərbaycan Respublikasında "Ekologiya ili" elan olunmasına həsr edilib.Olimpiada aprelin 7-dən 11-dək Təhsil Nazirliyi, Ekologiya və Təbii Sərvətlər Nazirliyi, Azərbaycan Dövlət Neft Şirkətinin dəstəyi və "Çağ" Öyrətim İşlətmələri Şirkətinin təşkilatçılığı ilə keçiriləcək.

Qeyd olundu ki, bu olimpiada Azərbaycanda ilk dəfə 2007-ci ildə keçirilmiş və dünyanın 17 ölkəsindən 70-ə qədər şagird iştirak etmişdir. 2008-2009-cu illərdə keçirilmiş olimpiadalarda isə iştirakçıların sayı artmışdır. Bu il keçiriləcək olimpiadada isə 33 ölkədən 300-ə yaxın şagird mübarizə aparacaq.

Təşkilat komitəsinə bu il 300-dən çox layihə təqdim olunmuş və onlardan 97-si seçilərək münsiflər heyətinin müzakirəsinə verilib. Münsiflər heyətində xarici ölkələrdən və Azərbaycandan dəvət olunmuş tanınmış və təcrübəli alimlər təmsil olunurlar.

Sonda KİV nümayəndələrinin suallarına cavablar verildi.

Niyazi RƏHİMOV