Bu günlərdə Bakıdakı 162 nömrəli məktəbdə şəhid Etibar Allahverdi oğlu Əliyevin doğum günü qeyd edilib.

Dövlət himnimiz səsləndirildikdən sonra iştirakçılar vətən uğrunda canından keçmiş şəhidlərimizin xatirəsini bir dəqiqəlik sükutla yad etdilər.

Tədbiri giriş sözü ilə açan məktəbin direktoru Ələkbər Əliyev Etibarın şərəfli ömür yolundan danışaraq, qəhrəmanların ölmədiklərini, daim qəlblərdə yaşadıqlarını bildirdi. Hər il şəhidin doğum günü məktəbdə qeyd olunur. Bildirildi ki, bu tədbirlər şagirdlərdə vətənpərvərlik ruhunun aşılanmasına  xidmət edərək onların şəxsiyyət kimi formalaşmasında müstəsna rol oynayır. Şagirdlərin vətənə məhəbbət ruhunda tərbiyəsinə xüsusi diqqət yetirildiyini vurğulayan direktor şəhidlərimizin qanının yerdə qalmayacağına və torpaqlarımızın tezliklə azad olunacağına inandığını söylədi.

Sonra söz şəhidin atası Allahverdi Əliyevə verildi. O, bütün iştirakçıları salamlayaraq Etibarın uşaqlıq və gənclik illərindən danışdı. Oğlunun döyüşlərdə göstərdiyi igidliklərdən söz açaraq onunla fəxr etdiyini və belə tədbirin hazırlanmasına görə məktəbin direktoruna, müəllim kollektivinə və mərasimdə əməyi olan hər bir şəxsə minnətdarlıq etdi.

Digər çıxış edənlər Etibar haqqında danışaraq belə oğullarımızla qürur hissi keçirdiklərini bildirdilər.  Tədbir şagirdlərin və 33 nömrəli uşaq bağçasının birlikdə hazırladığı əsrarəngiz səhnəciklərlə davam etdirildi. Bu səhnəciklərdə şagirdlərin vətənə, dövlətə olan məhəbbəti aydın görünürdü.

***

Bakıdakı 144 nömrəli orta məktəbdə şəhid Namiq Babayevin anadan olmasının 40 illiyi ilə əlaqədar tədbir keçirildi.

Dövlət himninin oxunması və vətənimizin azadlığı, ərazi bütövlüyü, müstəqilliyi uğrunda şəhid olanların xatirəsinin bir dəqiqəlik sükutla yad edilməsi ilə başlayan tədbirdə şəhidin ailə üzvləri, müəllimlər, şagirdlər iştirak edirdilər. Azərbaycanın Milli Qəhrəmanı ilə bağlı təşkil edilən sərgiyə baxış keçirildikdən sonra tədbir iştirakçılarına şəhid Namiq Babayevin həyat yolu və döyüşlərdə göstərdiyi şücaəti haqqında məktəbin direktoru Raya Allahverdiyeva məlumat verdi.

Şəhidin atası çıxışında bildirdi ki, Azərbaycanda bu gün hökm sürən sabitliyin, əmin-amanlığın yaranmasında böyük xidmətləri olan ümummilli lider Neydər Əliyevin siyasi kursunu Prezident İlham Əliyev uğurla davam etdirir və torpaqlarımızın erməni işğalından azad  olunması  üçün  əlindən gələni əsirgəmir.

Məktəbdə  şagirdlərin  hərbi-vətənrərvərlik ruhunda tərbiyəsinə xüsusi diqqət yetirildiyini vurğulayan şəhidin müəllimləri bildirdilər ki,   təhsil ocağında Namiq Babayev  həftəsi keçirilir.

Sonda  şəhidə həsr olunan şeirlər söylənildi və mahnılar  oxundu.  

Niyazi RƏHİMOV,

Rəşad ZİYADOV