Şirvan şəhər 18 nömrəli məktəb-liseyin tarix müəllimi Alik Rzayevi şəhərin pedaqoji ictimaiyyəti həm də jurnalist kimi tanıyır. 60 yaşı gələn il tamam olacaq Alik müəllimin təxminən pedaqoji stajı qədər də jurnalistlik təcrübəsi var. 1969-cu ildə Əli Bayramlı Pedaqoji Məktəbinə daxil olub. 1971-ci ildə oranı fərqlənmə diplomu ilə bitirmiş Alik Rzayevin ilk yazısı da mətbuatda məhz həmin il işıq üzü görüb.

Sonralar Bakı Dövlət Universitetinin tarix fakültəsində ali təhsil almış A.Rzayev müxtəlif illərdə Sabirabad rayonunun Ağacanlı (indi Hacıqabul rayonunun kəndidir) kənd səkkizillik məktəbində, Şirvan şəhər Bədən Tərbiyəsi və İdman Komitəsi nəzdindəki uşaq-gənclər idman məktəbində, 18 nömrəli orta, 152 nömrəli orta texniki peşə məktəblərində, şəhər təhsil şöbəsində müəllim, məşqçi, metodist vəzifələrində işləmiş, şəhər 13 nömrəli məktəbin direktoru olmuşdur. Hazırda 18 nömrəli təbiət-humanitar fənlər təmayüllü məktəb-liseydə tarix fənnini tədris edir. Onun pedaqoji stajı və təcrübəsi kimi jurnalist-publisist fəaliyyəti də kifayət qədər zəngin və əhatəlidir. 1969-cu ildən dövri mətbuatda çıxış edən Alik Rzayev müxtəlif qəzetlərin bölgə müxbiri, redaktor müavini, redaktoru olub. Alik müəllim qəzetimizlə də daim əlaqə saxlayır. "Azərbaycan müəllimi"ndə müxtəlif illərdə onlarca yazısı işıq üzü görüb.

Qabaqcıl pedaqoq və ictimaiyyətçi, jurnalist-publisist Alik Rzayev indiyədək 18 kitab və kitabça yazıb çap etdirmiş, 4 kitabın tərtibçisi və redaktoru olmuşdur. Onun müəllifi olduğu və müxtəlif illərdə ayrı-ayrı nəşriyyatlar tərəfindən çapdan buraxılmış "İstedadlar sorağında", "İstedadlar sərvətimizdir", "Əli Bayramlı musiqi məktəbi", "Yeniləşən məktəb", "Şərəfli peşə sahibləri", "Cəmiyyətin gələcəyi uşaqlar", "Sevincimiz uşaqlar", "Müəllim ömrü", "Sabahımız uşaqlar" və başqa kitabları sırf məktəblə, maariflə bağlı olub, təhsilimizə xidmətin bariz nümunələri kimi diqqəti cəlb edir. Həmin kitablar həm də Şirvan və Muğan zonalarında qabaqcıl müəllimlərin, istedadlı uşaqların üzə çıxarılması və ictimaiyyətə tanıdılmasında böyük rol oynayıb.

Azərbaycan milli mətbuatının 135 illik yubileyinin ölkəmizdə geniş qeyd olunduğu bu günlərdə Alik müəllimin çoxillik jurnalistlik-publisistlik fəaliyyəti yüksək qiymətləndirilmiş, ona Azərbaycan KİVİHİ-nin "Qızıl qələm" mükafatı verilmişdir. Tələbə yoldaşım Alik müəllimi təbrik edir, ona daha böyük yaradıcılıq uğurları arzulayıram.

Yusif ƏLİYEV