2010-2011-ci dərs ilində I siniflərdə dərs deyəcək ibtidai sinif müəllimləri üçün təlim kurslarının təşkili məqsədi ilə keçirilmiş tenderin qaliblərindən biri olan Şəxsiyyətin İnkişafı və Yeni Pedaqoji Texnologiyalar üzrə İctimai Birlik respublikamızın bir sıra bölgələrində müvafiq treninqlərə start verib. Təhsil Nazirliyi ilə sözügedən ictimai birlik arasında bağlanmış müqaviləyə uyğun olaraq bu qeyri-hökumət təşkilatı  yay tətili dövründə üç lot üzrə 28 təlim mərkəzində birinci sinif müəllimləri üçün treninqlər keçirəcək. 27 nəfər təlimçinin aparacağı kurslarda 2049 müəllimin əhatə olunması nəzərdə tutulub.

Bu silsilədən ilk kurslardan biri Ucar rayonunda baş tutub. İyunun 29-dan iyulun 3-dək keçirilmiş həmin təlim kurslarında rayonun 70 ibtidai sinif müəllimi iştirak edib. 4 qrupda təşkil olunan təlim kurslarını İctimai birliyin əlaqələndiricisi X.Osmanovanın ümumi rəhbərliyi altında təlimçilər G.Mustafayeva, S.Əmirəliyeva, A.Kərimova və Z.Əliyeva aparıblar. Təhsil Nazirliyi tərəfindən təsdiq olunmuş tədris planı və proqramı əsasında keçirilmiş treninqlərdə ibtidai sinif müəllimləri yeni kurikulumun tətbiqi ilə bağlı müvafiq bilik və bacarıqlara yiyələnib, öz hazırlıqlarını artırıblar. Canlı şəkildə, diskussiya şəraitində keçirilmiş kurslar müəllimlər üçün həm də fəal təlim metodları ilə daha yaxından tanış olmaq və onların tətbiqini təcrübədə görmək baxımından faydalı olub.

Kursu başa vuran müəllimlərə dərəcəli sertifikatlar təqdim olunub. Ucar RTŞ-ın müdiri Fuad İsrafilov, RTŞ metodkabinetinin müdiri Əliyar Qəhrəmanov mütəmadi olaraq kursların gedişi, müəllimlərin davamiyyəti ilə maraqlanıb, bir sıra təşkilati məsələlərin həllində İctimai Birliyin təmsilçilərinə yaxından kömək göstəriblər.

Şəfiqə ƏHMƏDOVA,
Ucar RTŞ-ın ibtidai
siniflər üzrə metodisti