Martın 19-da Təhsil Nazirliyində  doktorantların və gənc tədqiqatçıların XIV Respublika elmi konfransının yekunlarına, konfransda fərqlənmiş iştirakçıların mükafatlandırılmasına həsr olunmuş mərasim keçirildi.

Tədbiri  təhsil naziri Misir Mərdanov açaraq  son illərdə doktorantların və gənc tədqiqatçıların elmi yaradıcılığını stimullaşdırmaq , habelə onların elmi nailiyyətlərini müzakirə etmək və gənclərin yaradıcılıq potensialını inkişaf etdirmək məqsədi ilə həyata keçirilən tədbirlərdən danışdı. Nazir Misir Mərdanov ölkə başçısı cənab İlham Əliyev tərəfindən  Azərbaycan elminin inkişafı istiqamətində görülən məqsədyönlü işlərdən söz açdı. Nazir qeyd etdi ki, dövlət başçısının imzaladığı  müvafiq sərəncamlar  elmə və təhsilə göstərdiyi ən böyük diqqət və qayğının  parlaq nümunəsidir. Bu gün respublikada elmin inkişafına ümidlə baxılır, çünki bizim kifayət qədər  istedadlı gənclərimiz var və onların sayı getdikcə artmaqdadır. Elmin inkişafı , yeniləşməsi, uğurlu nəticələrin əldə olunması ilə bağlı  ali məktəblərin qarşısında  duran vəzifələrə toxunan təhsil naziri gənclərimizin elmi -tədqiqat işlərinə cəlb olunması , istedadlı gənclərin aşkar edilməsi məqsədi ilə Təhsil Nazirliyinin keçirdiyi tədbirlər arasında doktorantların və gənc tədqiqatçıların konfransının  özünəməxsus rolu olduğunu bildirdi. Nazir belə tədbirlərdə gənclərin məşğul olduqları elm sahələrindəki nailiyyətləri nümayiş etdirməklə yanaşı , elmi işlərində əldə etdikləri uğurlar haqqında da  məruzə etmək hüququ qazandıqlarını söylədi. Təhsil naziri çıxışında  keçirilmiş elmi konfrans haqqında məlumat  verdi. Qeyd olundu ki, 4-5 dekabr 2009-cu il tarixlərində Təhsil Nazirliyinin təşkilatçılığı ilə Azərbaycan Dillər Universitetində doktorantların və gənc tədqiqatçıların  XIV Respublika elmi konfransı keçirilib. Elmi konfransda bütün ali məktəblərin, o cümlədən qeyri-dövlət ali məktəblərinin  doktorant və gənc tədqiqatçılarının  iştirakı üçün şərait yaradılıb. Doktorantların və gənc tədqiqatçıların respublika elmi konfransı ənənəvi olaraq hər il keçirilir. Elmi konfransa  20 ali məktəbdən 298 tezis təqdim edilib. Konfransın 19 bölməsində 222 məruzə dinlənilib və müzakirə olunub. Məruzəçilərdən 58 nəfəri elmi işinin aktuallığı, yeniliyi və mövzusunu auditoriyaya çatdırmaq bacarığı ilə fərqlənib, 5 nəfərin məruzəsi isə ən yaxşı məruzə kimi qiymətləndirilib. Nazir Misir Mərdanov ildən-ilə gənclər tərəfindən konfransa  marağın artdığını, təqdim olunan məruzələrin elmi səviyyəsinin getdikcə yüksəldiyini qeyd etdi. Bunun təqdirəlayiq hal olduğunu bildirən nazir konfransda fərqlənmiş gənclərə ən xoş istəklərini çatdıraraq onlara elmi nailiyyətlər arzuladı.

Mərasimdə çıxış üçün söz alan təhsil nazirinin müavini İradə Hüseynova elmi konfransın keçirilməsində zəhməti olan  bütün şəxslərə təşəkkürünü bildirdi. Nazir müavini təşkilati məsələlərlə bağlı geniş məlumat verərək onu da qeyd etdi ki, təhsil nazirinin müvafiq əmri ilə elmi  konfransın bölmələrinin işinin təşkilində səmərəli fəaliyyətlərinə görə sədr və həmsədrlərə Təhsil Nazirliyinin təşəkkürü elan olunub. İradə Hüseynova onların hər birinin adını çəkdi, bildirdi ki, doktorantların və gənc tədqiqatçıların XIV Respublika elmi konfransının materialları Azərbaycan Dillər Universiteti tərəfindən çap olunaraq konfrans iştirakçılarına paylanacaq. Nazir müavini çıxışının sonunda bütün gəncləri əldə etdikləri uğur münasibəti ilə təbrik etdi.

Tədbirdə iştirak edən Azərbaycan Dillər Universitetinin rektoru, millət vəkili Səməd Seyidov keçirilmiş elmi konfransın respublikamızın ali məktəblərində təhsil alan gənclərin elmi-tədqiqat işinə cəlb olunmasında , bilik və bacarıqlarının üzə çıxarılmasında, onlarda elmə həvəs oyadılmasında əhəmiyyətli rol oynadığını xüsusi vurğuladı. Rəhbərlik etdiyi ali məktəbdə təhsillə bağlı həyata keçirilən tədbirlərdən söz açan rektor sonda konfrans iştirakçılarına müvəffəqiyyətlər dilədi.

Sonra doktorantların və gənc tədqiqatçıların XIV Respublika elmi konfransında fərqlənmiş iştirakçıların adları açıqlandı. 58 doktorant və gənc tədqiqatçıya sertifikatlar təqdim edildi. Ən yaxşı məruzə ilə çıxış etmiş 5 nəfər isə noutbukla mükafatlandırıldı. 

Samirə KƏRİMOVA