Martın 31-də Tofiq İsmayılov adına Uşaq-Gənclər Yaradıcılıq Sarayının "Uşaq dünyası" qalereyasında Azərbaycanlılara qarşı ermənilər tərəfindən törədilmiş soyqırımlara həsr olunmuş "Erməni genosidi" mövzusunda respublika rəsm müsabiqəsinin yekunu ilə bağlı tədbir keçirildi. Təhsil Nazirliyinin təşkilatçılığı ilə keçirilmiş müsabiqəyə respublikanın ali, orta ixtisas, peşə təhsili müəssisələrinin və ümumtəhsil məktəblərinin tələbə və şagirdlərinin təqdim etdikləri 400-ə yaxın rəsm əsərindən 250-si Respublika Rəssamlıq Akademiyasının mütəxəssisləri tərəfindən seçilmişdir. Növbəti seçimdə isə 36 rəsm əsəri I, II və III yerlərə layiq görülmüşdür.

Tədbiri giriş sözü ilə açan təhsil nazirinin müavini Elmar Qasımov bildirdi ki, ermənilərin azərbaycanlılara qarşı törətdikləri soyqırımlar XX əsrin ən dəhşətli faciələrindəndir. Belə faciələr müəyyən dövrlərdə respublikamızın müxtəlif bölgələrində sistemli şəkildə törədilmişdir. Həmin soyqırımların izləri hələ də açılmaqdadır. Nazir müavini qeyd etdi ki, Qubadakı kütləvi məzarlıq erməni vəhşiliyi və vandalizmini açıq şəkildə sübut edir. Elmar Qasımov dəhşətli soyqırımların tez-tez xatırlanması və mahiyyətinin daha dərindən öyrənilməsi üçün belə tədbirlərin keçirilməsinin zəruriliyini bildirdi. O, qeyd etdi ki, bu qalereyadakı rəsm əsərləri erməni vəhşiliyinə qarşı nifrəti əks etdirməklə yanaşı, həm də gənclərdə vətənpərvərlik ruhunun yüksək dərəcədə olduğunu göstərir. 31 mart 1918-ci ildə ermənilər tərəfindən xalqımıza qarşı törədilmiş soyqırımına ümummilli liderimiz Heydər Əliyev 1998-ci ildə siyasi və hüquqi qiymət verərək tarixi fərman imzalamışdır. Bildirildi ki, soyqırımlar dünyanın bütün xalqlarının diqqətinə çatdırılmalı və bu işdə hər bir azərbaycanlı öz köməyini əsirgəməməlidir.

Sonra respublika Ailə, qadın və Uşaq Problemləri üzrə Dövlət Komitəsinin sədr müavini Aynur Sofiyeva çıxış edərək ermənilərin tarix boyu azərbaycanlılara qarşı yeritdiyi məkrli siyasətdən söz açdı. Qeyd etdi ki, bu soyqırımlar zamanı qadın və körpələr, şikəst və qocalar öldürülmüşdür. O, soyqırımın fəsadlarının hələ də davam etdiyini və insanlarda psixoloji problemlər yaratdığını vurğulayaraq, günahkarların tezliklə cəzalanacağına ümid etdiyini bildirdi. A.Sofiyeva belə müsabiqələrin və tədbirlərin keçirilməsini təqdirəlayiq hal kimi qiymətləndirərək, təhsil naziri Misir Mərdanova və təhsil ictimaiyyətinə minnətdarlığını bildirdi.

Sonda müsabiqənin qaliblərinə Təhsil Nazirliyi tərəfindən diplom və hədiyyələr verildi.

İştirakçılar erməni vəhşiliyini  əks etdirən rəsm əsərlərinə baxdılar. 

Niyazi RƏHİMOV