Zəng edənin səsindəki sevinc və fərəh ilk kəlmələrdən duyuldu.

O, Novruz bayramı münasibətilə təbrikdən sonra cavab verməyə imkan vermədən: - Fakültəmizin tələbəsi Honkonqda dünya çempionu olub, - dedi. - Bu barədə "Azərbaycan müəllimi"ndə xəbər verəydiniz.

Səsindən tanımışdım; Sumqayıt Dövlət Universiteti kimya fakültəsinin dekanı, dosent Qafar Ramazanov idi.

Martın 29-da, deyilən vaxtda redaksiyada görüşdük. Tomriz Həsənova Bakıdakı 60 nömrəli orta məktəbin məzunudur. 2008-ci ildə orta təhsili başa vuran Tomris artıq Çində geniş yayılmış uşu döyüş sənəti üzrə məşqlərlə çoxdan məşğul olurdu. Cəldlik, dəqiqlik, cəsarət və enerji, həm də incəlik və soyuqqanlılıq tələb edən bu idman növünə olan maraq ona atası Azər Həsənovdan keçib.

2009-cu ildə testlə qəbul imtahanlarında 405 bal toplayan Tomriz Azər qızı Sumqayıt Dövlət Universitetinin kimya fakültəsinə daxil oldu. Artıq tələbə idi və qəlbinin dərinliyində oyanan qeyri-adi bir hissin təsiri ilə məşqlərə davam etdi. 2010-cu ilin martında Honkonq şəhərində keçiriləcək yarışlara hazırlaşmağa başladı. Üstəlik ali məktəbdə ilk semestrin imtahanları olacaqdı.

...Martın 10-da yarışlar başlandı. Dünya çempionatında 6800 nəfər idmançı iştirak edirdi. Martın 14-də ilk rəqiblə qarşılaşan Tomriz Həsənova uşu üzrə yarışda birinci yeri qazanaraq Uzaq Şərq şəhərində Azərbaycanın idman şərəfini ləyaqətlə ucaltdı. 13 iştirakçı arasında yaş həddinə görə I yeri qazanan idmançı qız Azərbaycan bayrağı altında, Azərbaycan himninin sədaları altında qürurla dayanmışdı. Bu, idmanın inkişafına, bədən tərbiyəsinin kütləviliyinə yüksək qiymət verilən, böyük diqqət yetirilən ölkədə idman uğurları salnaməmizə yazılmış yeni zəfərlərdən biri idi.

Sözarası onun təhsili ilə maraqlandıq. Eksperimental biologiya kafedrasının müdiri, dosent Ələddin Qədimov fakültənin biologiya müəllimliyi ixtisaslı 324-cü qrup tələbəsi Tomriz Həsənovanı tərbiyəli, sakit və çalışqan bir bakalavr kimi səciyyələndirdi. Yanvar semestrindəki imtahanlardan "4"-"5" qiymətlər aldığını söylədi.

Ulu öndərimiz Heydər Əliyevin təşəbbüsü və xeyir-duası ilə yaradılmış Sumqayıt Dövlət Universitetinin 10 illik salnaməsində nailiyyətlər az deyil. 2010-cu ilin uğurları sırasında tələbə T.Həsənovanın dünya çempionatındakı yüksək göstəricisi Novruz bayramı ərəfəsində qazanılmış ən sevindirici müvəffəqiyyətdir. Uğurlar olsun! 

Ş.MƏMMƏDOV