"Xalq kompüteri" layihəsinin ikinci mərhələsi üzrə 7 min 893 kompüter və lisenziyalı proqram təminatı satılmışdır.

Layihənin işçi qrupundan AzərTAc-a verilən məlumata görə, bu mərhələdə layihənin əsas məqsədi yalnız orta məktəb müəllimləri deyil, digər sosial təbəqələrin də müasir kompüter və lisenziyalı proqram təminatını güzəştli şərtlərlə əldə etməsi üçün şərait yaratmaq, bölgələrdə İKT-nin tətbiqini genişləndirməklə rəqəmli geriliyi azaltmaq, Azərbaycan hökumətinin informasiya cəmiyyətinin inkişaf etdirilməsi istiqamətində apardığı fəaliyyəti dəstəkləməkdir.

Rabitə və İnformasiya Texnologiyaları və Təhsil nazirlikləri, HP, "Microsoft" şirkətlərinin birgə həyata keçirdikləri layihə çərçivəsində kompüterlər bazar qiymətindən 25-40 faiz aşağı qiymətlərlə, güzəştli şərtlərlə 12 aylıq faizsiz kreditlə təqdim olunur. Kompüterlərin təchizatı ilə HP-nin yerli tərəfdaşı - "Bestcomp Group" şirkəti məşğul olur.