Zinyət müəllimin qayğıkeşliyi haqqında çox eşitmişdim. 1969-cu ildə Gəncə Dövlət Pedaqoji İnstitutunu bitirdikdən sonra ilk əmək fəaliyyətinə Qax rayonundakı Qıpçaq kənd orta məktəbində başlayıb. Atası Nəsib müəllim də uzun müddət pedaqoji fəaliyyətlə məşğul olub. Elə Zinyət müəllim də atasının bu şərəfli yolunu davam etdirir.

Zinyət Məmmədova hazırda dərs dediyi təhsil ocağında kiçikyaşlı məktəblilərin təlim-tərbiyəsi ilə məşğul olur. Yaxşı bilir ki, şagirdlərin təlim-tərbiyəsi müəllimin şəxsi nüfuzundan, təşəbbüskarlığından çox asılıdır. O, axtarışı, yeniliyi çox sevir. Elə buna görə də öz dərslərində interaktiv təlim üsulundan, cütlər və qruplardan, əyləncəli məsələlərdən, didaktik oyunlardan böyük həvəslə istifadə edir.

Z.Məmmədova "Gözəl Vətən" və "Can Azərbaycan" mahnılarını tədris edərkən uşaqlarda Vətənə sonsuz məhəbbət hissi aşılayır. Azərbaycanın keçmişi və bu günü, onun əsrarəngiz təbiəti, təbii sərvətləri, əhalisi, milli ordumuz və düşmən əlindəki torpaqlarımızın tezliklə alınacağından böyük inamla söhbət açır.

Məlumdur ki, ibtidai siniflərdə dər

slərin tədrisi prosesində təlimin ən başlıca vəzifələrindən biri öyrənməyi öyrətməkdir. O, şagirdlərə müəllimi diqqətlə dinləmək, müstəqil işləmək, oxuduqlarını başa düşmək, təşəbbüskar və yaradıcı olmaq vərdişi aşılamağın son dərəcə vacib olduğunu yaxşı bilir. Mən onun dərslərini bir neçə dəfə dinləmişəm. Hər dəfə də böyük zövq almışam. Şagirdlərinin onu necə böyük maraqla dinlədiyinin də şahidi olmuşam. Bir dəfə də o, dərsin mövzusuna uyğun olaraq uşaqlara analar haqqında danışırdı. Onun səsindəki məlahət, səmimiyyət, baxışlarındakı mehribançılıq şagirdlərdə anaya - bu müqəddəs varlığa qarşı sonsuz bir sevgi və məhəbbət oyadırdı.

Bütün bunlarla yanaşı məktəbin həyətində iki qadının söhbəti heç yadımdan çıxmır. Həmin valideynlərdən biri o birinə deyir ki, mən uşağımı məktəbə bir il gecikdirdim ki, Zinyət müəllimin sinfində oxusun. Bax, mən onda  hiss etdim ki, Zinyət müəllimdə uşaqların  qəlbinə yol tapmaq, onları ələ almaq istedadı var. Öz dərslərini maraqlı qurmaq, hər bir şagirdə fərdi yanaşmaq məharəti, qayğıkeşliyi, səmimiliyi və tələbkarlığı onu hamıya bax, beləcə sevdirir.

Zinyət Məmmədovanın vaxtilə dərs dediyi şagirdlərinin arasında müxtəlif peşə, sənət sahibləri az deyil. Onlar tez-tez bu qayğıkeş müəllimləri ilə görüşürlər. Zinyət müəllim də onların həyatda qazandıqları uğurlara çox sevinir.

Biz də bu qayğıkeş, səmimi insan olan Zinyət müəllimə bütün işlərində uğurlar diləyir, həyatda isə ən şirin nemət olan cansağlığı arzulayırıq.

Elvira LƏBİBOVA