Azərbaycan Respublikasının Prezidenti İlham Əliyevin "Ən yaxşı ümumtəhsil məktəbi və ən yaxşı müəllim mükafatlarının təsis edilməsi haqqında" imzaladığı tarixi Sərəncam Bakının Maştağa qəsəbəsindəki 187 nömrəli orta məktəbin pedaqoji kollektivini də  sevindirdi. Bütün uğurlarını və çətinliklərini düzgün təhlil edərək imkanlarını səfərbər edən bu təhsil müəssisəsi də  şəffaf və ədalətli qaydada keçirilən "Ən yaxşı ümumtəhsil məktəbi"nin builki müsabiqəsinə  qatıldı. Hazırda ölkənin ən yaxşı  məktəbləri sırasında yer qazanan 187  nömrəli orta məktəbin pedaqoji kollektivi bu yüksək mükafata və təhsilə göstərilən diqqət və qayğıya görə dövlətimizin başçısına   minnətdarlığını bildirir. 

Məktəbin direktoru Nailə Məmmədova bildirdi ki, keçən  dərs ilində məktəbi bitirən məzunların 32 nəfəri ali, qalanları isə orta ixtisas və peşə məktəblərinə qəbul olunub. Bu təhsil müəssisəsi respublikada  təcrübəsi  yayılmış baza məktəbi olmaqla bərabər, həm də "Öyrədənlərin öyrədəni" sertifikatını alıb.

2009-2010-cu tədris ilində  bu təhsil ocağında bütün fənlər üzrə  "açıq dərs"lər təşkil olunub, "dəyirmi masa"lar keçirilib. Milli Kurikulumun öyrənilməsi və tətbiqi  həmişə  diqqət mərkəzində saxlanılıb. Şagirdlərin müxtəlif fənn olimpiadalarında uğurlu nəticələr qazanmasında müəllimlərdən Zərxanım Əsgərova, Arzu Rüstəmova, Validə Qədimova və başqalarının zəhməti böyük olub. Məktəbin təcrübəli pedaqoqları şagirdlərin təlim-tərbiyəsində, gənc müəllimlərin pedaqoji ustalığının artırılmasında  bütün qüvvələrini sərf edirlər.

Şakir CƏFƏROV