|
Bir nəğmə səslənirdi. Bu nəğməni dinlədikcə
insan sanki körpə olur, özünü qayğısız bir
dünyada hiss edirdi. Bu, Oqtay Zülfüqarovun
uşaqlar ücün bəstələdiyi mahnı idi. Mahnının
ifaçısı elə gözəl oxuyurdu ki, uşaqlar ona
diqqətlə qulaq asırdılar. O, ömrünün 45 ilini
bax beləcə qayğısını çəkdiyi körpələrə gözəl
nəğmələr öyrətməklə keçirmişdir.
Haqqında söhbət açacağımız insan Bakıdakı 38
nömrəli uşaq bağçasının musiqi müəllimi Zemfira
Nuriyevadır. O, 1940-cı ildə Bakı şəhərində
anadan olub.
1965-ci ildə orta musiqi məktəbini bitirərək 38
nömrəli bağçada fəaliyyətə başlamışdır.
Z.Nuriyeva respublikanın müxtəlif rayonlarında
olmuş, məktəbəqədər təlim-tərbiyə proqramı üzrə
musiqi müəllimlərinə mühazirələr söyləyib,
seminarlar keçirmişdir. O, təhsildə göstərdiyi
xidmətinə görə müxtəlif fəxri fərman və
diplomlarla mükafatlandırılmışdır.
Zemfira müəllim 45 illik təcrübəsi olmasına
baxmayaraq, həmişə axtarışda olur, yeni təlim
metodlarından istifadə etməyə çalışır.
Bütün varlığı ilə uşaqlara bağlı olan
Z.Nuriyeva xalq və bəstəkar mahnılarımızı
onlara sevə-sevə öyrədərək milli ruhun
formalaşmasına, vətənpərvərlik hissinin
aşılanmasına xidmət edir. O həm də elə mahnılar
seçir ki, uşaqlar onu asanlıqla mənimsəyir,
yaddaşlarına həkk edirlər.
Z.Nuriyevanın dediklərindən:
- Mənim nə qədər ömrüm varsa, hamısını uşaqlarla
keçirmək istərdim. Bu günlərdə 70 yaşım tamam
olur. Ömrümün 45 ilini burada keçirmişəm və
bununla fəxr edirəm. Fəxr edirəm ona görə ki, bu
uzun illər ərzində, az da olsa, uşaqlara nəsə
öyrədə bilmişəm. Musiqi aləmində ilk addımını
atmağa kömək etdiyim Fidan Hacıyeva İtaliyada
opera səhnəsində oxuyanda sevincimin
həddi-hüdudu yox idi. Hazırda bağçamızın
yetirmələrindən Musiqi Akademiyasında və orta
ixtisas musiqi məktəblərində təhsil alanlar da
var. Onlar tez-tez mənimlə əlaqə saxlayır və
bizi unutmurlar.
Biz müəllimlər çalışmalıyıq ki, uşaqlar həyata
açıq gözlə baxsınlar və haqqı, ədaləti hər
şeydən üstün tutsunlar. Hər bir uşağı öz
xarakterinə görə tədricən müsbətə doğru tərbiyə
etmək lazımdır. Allahdan arzum odur ki, Yer
üzərində sülh olsun və bütün uşaqlar kimi
mənim ömür nəğmələrim olan nəvələrim də həmişə
əmin-amanlıq, xoşbəxtlik içərisində yaşasınlar.
Qoy onlar zəhmətsevər, qayğıkeş, Vətənini sevən
şəxsiyyət olsunlar.
Bəli, biz də Zemfira müəllimə bu şərəfli, nəcib
işində uğurlar arzulayaraq ona cansağlığı və
uzun ömür diləyirik. 70 yaşınız mübarək.
Niyazi RƏHİMOV |
