Böyük Britaniyanın Azərbaycandakı səfirliyinin missiya rəhbəri Simon Tonq və Böyük Britaniya Şurasının Cənubi Qafqaz üzrə nümayəndəsi Paul Doubleday Naxçıvan Dövlət Universitetində olmuşlar. NDU-nun rektoru, akademik İsa Həbibbəyli qonaqlarla görüşərək ölkələrarası münasibətlərin inkişafında elm, təhsil sahəsində əlaqələrin böyük rol oynamasından danışmışdır. Universitetin strukturu, müəllim və tələbə kollektivi barədə ətraflı məlumat verən rektor bu ali təhsil ocağının çoxşaxəli beynəlxalq əlaqələrə malik olduğunu, o cümlədən tanınmış Avropa universitetləri ilə əməkdaşlıq etdiyini vurğulamışdır. Sonra Böyük Britaniya səfirliyinin nümayəndələri universitetin Beynəlxalq münasibətlər və xarici dillər fakültəsində, İngilis dili kafedrasında olmuş, xarici dillərin tədrisi səviyyəsindən razı qalmışlar.

Universitetin müəllim və tələbələri ilə keçirilən görüşdə ingilis dilinin mükəmməl öyrənilməsi üçün birgə görüləcək tədbirlərdən söz açılmışdır. Sonra fakültənin İnternet mərkəzində ingilis dili ixtisası üzrə müəllim və tələbələrin iştirakı ilə treninq keçirilmişdir. 

Mehriban SULTAN