"Gülüstan" sarayında Azərbaycan Dövlət İqtisad Universitetinin təşkilatçılığı ilə İslam Dünyası Universitetləri Federasiyasının (İDUF) V baş konfransı keçirilir.

Müxtəlif ölkələrin (Azərbaycan, Türkiyə, İran, Malayziya, Misir, Pakistan, Səudiyyə Ərəbistanı, Küveyt və s.) universitetlərinin rektorlarının iştirak etdikləri konfransda çıxış edən təhsil naziri Misir Mərdanov müasir dünyada elmin, təhsilin mühüm rolundan danışmışdır.

Konfransın əhəmiyyətini vurğulayan nazir islam ölkələri universitetləri arasında əlaqələrin daha da genişləndirilməsinin, birgə elmi tədqiqatların vacibliyini diqqətə çatdırmış, tədbirin təşkilatçılarına və iştirakçılarına təşəkkürünü bildirmiş, uğurlar arzulamışdır.

Azərbaycan Dövlət İqtisad Universitetinin rektoru, Milli Məclisin elm və təhsil komitəsinin sədri Şəmsəddin Hacıyev çıxış edərək, Azərbaycan Respublikasının Prezidenti İlham Əliyevin elmin və təhsilin inkişafına daim böyük önəm verdiyini vurğulamış, bu sahə ilə bağlı Prezident sərəncamlarının əhəmiyyətindən danışmışdır.

Azərbaycanın Avropa təhsil məkanına - Boloniya prosesinə qoşulduğunu xatırladan Ş.Hacıyev təhsilimizin dünya təhsil sisteminə uğurla inteqrasiya olunduğunu söyləmişdir.

İSESKO Baş direktorunun müavini Hadi Azizzadeh, Küveyt Universiteti rektorunun müavini Najem Al-Najem və digər natiqlər İslam ölkələri universitetlərində qazanılan təcrübə və nailiyyətlərdən bəhs etmiş, müvafiq sahə ilə bağlı fikir və mülahizələrini bildirmişlər.

Konfransda həmçinin son üç il ərzində İslam Dünyası Universitetləri Federasiyasının təhsilin inkişafı üzrə həyata keçirdiyi layihələr, qarşıda duran vəzifələr barədə məlumat verilmiş, İslam ölkələri universitetləri arasında əlaqələrin daha da genişləndirilməsi ilə bağlı müzakirələr aparılmışdır.

Konfrans mayın 14-də başa çatacaqdır.

AzərTAc