İmtahanların gedişini valideynlər və kütləvi informasiya vasitələrinin nümayəndələri də izlədilər.

İyunun 16-da Bakı və Sumqayıt şəhərlərinin ümumtəhsil məktəblərinin XI siniflərində buraxılış imtahanları keçirildi.

Bakı şəhəri üzrə 73 imtahan mərkəzində 24933, Sumqayıt şəhəri üzrə 11 imtahan mərkəzində 4083 şagird imtahan verdi.

Həmin gün Bakı şəhəri üzrə ötən tədris illərində attestat ala bilməyən 1790 nəfər də 4 imtahan mərkəzində, Sumqayıt şəhəri üzrə isə 240 nəfər 1 imtahan mərkəzində imtahan verib.

Qeyd edək ki, iyunun 16-da ümumilikdə Bakı şəhəri üzrə 77 imtahan mərkəzində 26723, Sumqayıt şəhəri üzrə isə 12 imtahan mərkəzində 4323 şagird imtahan verib.

Həmin gün Təhsil Nazirliyinin təşəbbüsü ilə XI siniflərdə keçirilən buraxılış imtahanlarının gedişini izləmək məqsədilə valideynlər və KİV nümayəndələrindən ibarət müşahidə qrupu təşkil olundu. Təhsil Nazirliyinin, Valideyn-Müəllim Assosiasiyasının nümayəndələri də bu qrupda iştirak edirdilər.

İştirakçılar imtahan prosesini öncə "Ankara məktəbi" məktəb-liseyində müşahidə etdilər.

Binanın 3 mərtəbəsində yerləşən sinif otaqlarında təşkil edilmiş imtahan prosesinə 5 imtahan rəhbəri nəzarət edirdi. Qrupun üzvləri ilə birlikdə ayrı-ayrı sinif otaqlarında imtahan prosesini izlədik, sualların necə tərtib olunması ilə bağlı onbirincilərin fikirləri ilə maraqlandıq, imtahan rəhbərləri və nəzarətçilərdən bu təhsil ocağında keçirilən buraxılış imtahanları haqqında ətraflı məlumat aldıq. İmtahan rəhbərləri təşkilati məsələlərdə heç bir problemin yaranmadığını, prosesin təlimata uyğun aparıldığını bildirdilər.

Müşahidəçilər məktəb-liseyin həyətində toplaşan valideynlərlə də söhbət etdilər. Onlar burada imtahanın təşkilindən çox razı qaldıqlarını bildirdilər. İmtahanın gedişini  izləmək məqsədi ilə 229 nömrəli məktəbdə də olduq. Burada da valideynlər imtahanların çox obyektiv aparıldığını bildirdilər. Bir neçə valideyn və imtahan rəhbəri  ilə birlikdə sinif otaqlarını gəzərək imtahanların gedişini izlədik.

Onbirincilər yaradılan şəraitdən razı qaldıqlarını, ayrı-ayrı fənlər üzrə hazırlanmış testlərdə çətinlik çəkmədiklərini bildirdilər.

İmtahanların gedişini izlədiyimiz növbəti təhsil ocağında - 175 nömrəli məktəbdə də hər kəs bu prosesin çox şəffaf və obyektiv keçirildiyini qeyd etdi. Valideynlər övladlarının biliyinin düzgün qiymətləndiriləcəyinə əmin olduqlarını dedilər.

Sonda Təhsil Nazirliyi Monitorinq və qiymətləndirmə şöbəsinin müdiri, filologiya elmlər doktoru Təranə Hacıyeva buraxılış imtahanlarına dair ətraflı məlumat verdi və bununla bağlı jurnalistləri maraqlandıran çoxsaylı sualları cavablandırdı. Eyni zamanda şöbə müdiri bildirdi ki, ölkə üzrə keçirilmiş buraxılış imtahanlarının nəticələri yaxın 4-5 gün ərzində açıqlanacaq. 

Hicran ƏKBƏROVA