Naxçıvan Dövlət Universitetində 2009-2010-cu tədris ilində Tələbə Elmi Cəmiyyəti xətti ilə yerinə yetirilmiş elmi-tədqiqat işlərinin yekununa dair ümumuniversitet elmi konfransı keçirilmiş, 17 bölmə üzrə iclaslarda tələbələrin müxtəlif sahələrdə apardıqları araşdırmaları, elmi-tədqiqat işləri müzakirə olunmuşdur. Bu günlərdə tələbələrin həmin konfransın bölmə iclaslarındakı fəal iştirakına görə 1-ci, 2-ci və 3-cü dərəcəli diplomlarla  mükafatlandırılması mərasimi olmuşdur.

Mərasimdə çıxış edən rektor, akademik İsa Həbibbəyli  tələbələrin müxtəlif ixtisaslar üzrə keçirilən bölmə iclaslarında  nümayiş etdirdiyi  fəallıqdan söz açmış, onların üstün zəka və intellektual potensiallarını  yüksək qiymətləndirmişdir. Rektor elmi işlər üzrə prorektorun Tələbə Elmi Cəmiyyətinin  işinin  səmərəli  təşkilindəki  rolunu  xüsusilə  qeyd etmişdir.

Elmi işlər üzrə prorektor, fizika-riyaziyyat elmləri namizədi Anar Kazımov tələbələrin bu elmi hesabatlarının yüksək səviyyədə keçdiyini bildirmiş və hər bir bölmənin işindən razılığını ifadə etmişdir.

Sonra  mükafatlandırma mərasimi başlanmışdır. Qeyd edək ki, 1-ci tura 307 tələbə ilə start verən tələbə elmi  konfransının  2-ci  turuna yalnız 152  tələbə  vəsiqə  qazana bilmiş,  onlardan  finala  çatmış 100 nəfərdən 32-si 1-ci, 37-si 2-ci, 31-i isə 3-cü dərəcəli  diplomlarla  təltif  olunmuşlar.

Təltif olunan tələbələrdən Tarix-filologiya fakültəsinin Jurnalistika ixtisası üzrə II kurs tələbəsi Türkan Hüseynli, Memarlıq və mühəndislik fakültəsinin  Energetika  ixtisası üzrə II kurs tələbəsi Tehranə Adıgözəlova, xarici tələbə Antoni Mokvunye  çıxış edərək layiq görüldükləri  mükafatlara  görə minnətdarlıqlarını ifadə etmiş, bundan sonra da əzmkarlıqla çalışacaqlarını bildirmişlər.

Nərmin CƏFƏROVA