İyunun 16-da "Excelsior" otelində Azərbaycan gənclərini Kipr Beynəlxalq Universitetində təhsil almağa cəlb  etmək məqsədi ilə universitetin  təqdimat mərasimi keçirildi. Tədbirdə  Təhsil Nazirliyinin  nümayəndəsi, məktəb direktorları, müəllimlər  və digər qonaqlar iştirak edirdilər.

Tədbir Kipr Beynəlxalq Universitetinin Azərbaycandakı təmsilçisi "Millenium" turizm şirkətinin təşkilatçılığı ilə gerçəkləşmişdir.Tədbirdə  çıxış edən Kipr Beynəlxalq Universitetinin rektoru Mehmet Yüksələn ölkələrimiz arasında mövcud siyasi, iqtisadi, mədəni əlaqələrdən danışdı. Universitetləri haqqında məlumat verərək qeyd etdi ki, bu təhsil ocağında dünyanın 28 ölkəsindən 5 minə  yaxın tələbə təhsil alır. Burada  tələbələrə 7 ixtisas üzrə təhsil almaq üçün lazımi şərait yaradılıb.  Tədbirdə iştirak edən Təhsil Nazirliyinin  şöbə müdiri Qulu Novruzov  ölkə Prezidenti İlham Əliyevin müvafiq Sərəncamı ilə təsdiq  edilmiş "2007- 2015-ci illərdə Azərbaycan gənclərinin xarici ölkələrdə  təhsili üzrə Dövlət Proqramı"nın uğurla həyata keçirilməsindən  danışdı.

Sonda tədbir iştirakçılarını maraqlandıran suallara  cavablar  verildi.

Şakir DAYANDUROĞLU