Bu günlərdə Qəbələ rayonunun Yenikənd kənd orta məktəbinin yeni binası istifadəyə verilib. 2009-cu ildə dövlət vəsaiti hesabına inşasına başlanılmış yeni məktəb binası bir korpusdan və iki mərtəbədən ibarət olmaqla, 480 şagird üçün nəzərdə tutulub.

Təhsil ocağı dünya standartlarına cavab verən müasir avadanlıqlarla təmin olunub. Məktəbdə 20 sinif otağı, 6 fənn kabineti, 2 laboratoriya, idman və akt zalları, kitabxana və bufet fəaliyyət göstərir.

Həmçinin rayonun Kiçik Əmilli kənd əsas məktəbi üçün 2009-cu ildə inşasına başlanmış yeni məktəb binası da tamamlanaraq müəllim və şagirdlərin ixtiyarına verilib. Heydər Əliyev Fondu hesabına inşa edilmiş bu bina 3 korpusdan, 1 mərtəbədən ibarət olmaqla, 240 şagird üçün nəzərdə tutulub. Binanın həyətində içməli və çirkab su anbarları, duru yanacaqla işləyən qazanxana inşa edilib. Təhsil ocağı istilik xətləri ilə təchiz olunub. Məktəbin kitabxanası, idman zalı, kompüter otağı və bütün sinif otaqları müasir avadanlıqlarla təmin edilib.

Yeri gəlmişkən qeyd edək ki, 2009-cu ildə Qəbələ rayonunda Heydər Əliyev Fondu hesabına 4, Təhsil Nazirliyinin xətti ilə 1 və Dövlət Proqramı çərçivəsində 1 yeni məktəb binaları inşa edilməklə, 6 məktəb binası istifadəyə verilib. Ümumiyyətlə, son 5 ildə Qəbələdə Heydər Əliyev Fondu hesabına 8 məktəb binası inşa edilərək istifadəyə verilib.

Nizami MİRZƏ