Oktyabrın 5-də Bakı Slavyan Universitetində Rusiya Yazıçılar İttifaqının və Rusiyanın PEN klubunun üzvü, müasir  rus nəsrinin görkəmli nümayəndəsi, şair, esse ustası Boris Timofeyeviç Yevseyevlə görüş keçirildi. Tədbirdə əvvəlcə  yazıçının əsərlərinin təqdimatı oldu. Qeyd edildi ki, bu, B.T.Yevseyevin BSU-ya ilk gəlişi deyildir. 2005-ci  ildə o, "Baran" adlı hekayələr toplusunu, "Romançik" romanını Azərbaycan oxucularına təqdim etmiş və müasir rus ədəbiyyatı haqqında məruzələrlə tələbə  və  magistrantlar qarşısında çıxış etmişdir.

Budəfəki səfərində isə Boris Timofeyeviç "Nəsrdə və  nəzmdə şüurluluq və təhtəlşüur (şüursuzluq)" mövzusunda tələbə və  magistrantlara ustad dərsi keçdi.

Tədbirdə yazıçının yaradıcılığı haqqında dəyərli fikir söyləyən BSU-nun rektoru, professor Kamal Abdullayev həm də B.T.Yevseyevin  universitetdə bəzi tələbə və  magistrantların elmi rəhbəri olduğunu da  diqqətə çatdırdı.

Sonra BSU-nun professoru Flora Hacıyeva, dosent İlahə Carçıyeva, magistrant və tələbələr də  yazıçının yaradıcılığı  haqqında danışdılar.

Növbəti gün  universitetdə Boris Timofeyeviç Yevseyevin "Müasir rus nəsrində ədəbi cərəyanlar və meyillər" adlı məruzəsi rəğbətlə dinlənildi.  

Şakir CƏFƏROV