Sentyabrın 29-da Təhsil Nazirliyində Bakı və Sumqayıt şəhərlərində yerləşən və birbaşa nazirlikdən maliyyələşən təhsil müəssisələrinin baş mühasiblərinin iştirakı ilə seminar-müşavirə keçirilmişdir. 

Təhsil Nazirliyinin İqtisadiyyat şöbəsinin müdiri Şahrza Əliyevin sədrliyi ilə keçirilən seminar-müşavirədə şöbənin əməkdaşları, Bakı və Sumqayıt şəhərlərində yerləşən, birbaşa nazirlikdən maliyyələşən təhsil müəssisələrinin baş mühasibləri iştirak etmişlər. Seminar-müşavirədə əsasən, aşağıdakı məsələlər müzakirə olunmuşdur:

- Birbaşa Təhsil Nazirliyindən maliyyələşdirilən xərclərin 2009-cu il üzrə icrası, 2010-cu ilin 9 ayı üzrə  icra vəziyyəti və 2011-ci ilin proqnoz göstəriciləri, mövcud problemlər və qarşıda duran vəzifələr.   

- Beynəlxalq və Milli Mühasibat Uçotu Standartlarının tətbiqi, problemlər və qarşıda duran vəzifələr.

- Ali təhsil müəssisələrində yeni maliyyələşdirmə mexanizminin tətbiqi işlərinin gedişatının vəziyyəti və bu sahədə görüləcək işlər.

- Əməkhaqlarının artımı ilə bağlı qarşıda duran vəzifələr, ştat və tarifləşmə cədvəllərinin yenidən hazırlanması ilə bağlı məsələlər.

- Rüblük və illik mühasibat hesabatlarının təqdim edilməsi barədə bir sıra məsələlər, təlimatlar, izahatlar və tövsiyələr.

- "İlk peşə-ixtisas təhsili müəssisələrinin büdcə təminatı normativlərinin hesablanması metodikası və tətbiq olunma Qaydaları"nın təsdiq edilməsi haqqında Azərbaycan Respublikası Nazirlər Kabinetinin 17 avqust 2010-cu il tarixli, 150 nömrəli Qərarının icrası ilə bağlı qarşıda duran vəzifələr.

Seminar-müşavirəni giriş sözü ilə açan İqtisadiyyat şöbəsinin müdiri Şahrza Əliyev tədbirin gündəliyi barədə məlumat verdikdən sonra 2009-cu ilin dövlət büdcəsi üzrə təhsil xərclərinin icrası, 2010-cu ilə dövlət büdcəsində nəzərdə tutulan təhsil xərcləri və 2011-ci ilə dövlət büdcəsinin proqnozlaşdırılan gəlir və xərcləri, həmçinin bir sıra göstəricilər barədə müqayisəli rəqəmləri tədbir iştirakçılarının  nəzərinə çatdırmış və bildirmişdir ki, təhsilə olan dövlət qayğısının yüksək təzahürü kimi bu sferaya dövlət büdcəsindən ayrılan vəsaitlərin həcmi ildən-ilə əhəmiyyətli dərəcədə artır. Sonra Ş.Əliyev keçirilən tədbirin əsas müzakirə mövzularının hər biri barədə qısa məlumat verərək hazırda baş mühasiblərin qarşısında duran vəzifələrdən danışmışdır. Tədbirdə həmçinin İqtisadiyyat şöbəsinin Plan-maliyyə sektorunun müdiri Vüqar Əsgərov birbaşa Təhsil Nazirliyindən maliyyələşdirilən xərclərin "2009-cu il üzrə icrası, 2010-cu ilin 9 ayı üzrə  icra vəziyyəti və 2011-ci ilə proqnoz göstəriciləri, mövcud problemlər və qarşıda duran vəzifələr", Mühasibat uçotu və hesabat sektorunun müdiri Fərhad Əliyev "Beynəlxalq və Milli Mühasibat Uçotu Standartlarının tətbiqi, problemlər və qarşıda duran vəzifələr", şöbənin baş məsləhətçisi Zahid Nağıyev "Təhsil işçilərinin əməkhaqlarının artımı ilə bağlı qarşıda duran vəzifələr, ştat və tarifləşmə cədvəllərinin yenidən hazırlanması ilə bağlı məsələlər", Mühasibat uçotu və hesabat sektorunun baş məsləhətçisi Akif Hacıyev "Rüblük və illik mühasibat hesabatlarının təqdim edilməsi ilə bağlı bir sıra məsələlər, təlimatlar, izahatlar və tövsiyələr",  Plan-maliyyə sektorunun aparıcı məsləhətçisi Ramil Orucov "Ali təhsil müəssisələrində yeni maliyyələşdirmə mexanizminin tətbiqi işlərinin gedişatının vəziyyəti və bu sahədə görüləcək işlər" və həmin sektorun baş məsləhətçisi Kəmalə Vəliyeva isə "İlk peşə-ixtisas təhsili müəssisələrinin büdcə təminatı normativlərinin hesablanması metodikası və tətbiq olunma Qaydaları"nın təsdiq edilməsi haqqında Azərbaycan Respublikası Nazirlər Kabinetinin 17 avqust 2010-cu il tarixli, 150 nömrəli Qərarının icrası vəziyyəti və bununla  bağlı qarşıda duran vəzifələr barədə məruzələrlə çıxış etmiş, baş mühasibləri maraqlandıran sualları cavablandırmışlar. 

Seminar-müşavirənin sonunda İqtisadiyyat şöbəsinin müdiri müzakirə olunan mövzular üzrə bir sıra məqamlara aydınlıq gətirmiş, nazirliyin rəhbərliyinin İqtisadiyyat şöbəsinin qarşısında qoyduğu yeni tələblərdən söz açmış, bu tələblərin yerinə yetirilməsi ilə bağlı tabe təşkilatların  baş  mühasiblərinin üzərinə düşən vəzifələri nəzərə çatdırmış və yekunda tədbir iştirakçılarını maraqlandıran  əlavə  sualları cavablandıraraq onlara  gələcək  işlərində  ugurlar  arzulamışdır.