Dekabrın 17-də AMİ-nin Ağcabədi filialında Azərbaycan Respublikası Prezidenti Administrasiyasının rəhbəri, akademik Ramiz Mehdiyevin yenicə çapdan çıxmış "Gorus - 2010: absurd teatrı mövsümü" kitabının müzakirəsi keçirildi.

Tədbirdə filialın professor-müəllim və tələbə heyəti ilə yanaşı Ağcabədi Rayon İcra Hakimiyyətinin, rayon təhsil şöbəsinin nümayəndələri də iştirak edirdilər.

Tədbiri giriş sözü ilə açan filialın direktoru, professor X.Məmmədov akademik R.Mehdiyevin  "Gorus - 2010: absurd teatrı mövsümü" kitabı barədə dolğun, təfərrüatlı məruzə etdi.

Məruzəçi Ermənistanın üzdəniraq prezidenti S. Sarkisyanın erməni diasporunu təmsil edən jurnalistlərə verdiyi müsahibəsinə tutarlı cavab verən hörmətli akademikin sözügedən əsərinin yüksək məziyyətlərindən bəhs etdi. Bildirdi ki, S.Sarkisyanın sayıqlamalarının hər birinə elmi əsasla, ən ümdəsi, faktlar, arqumentlərlə cavab verən R.Mehdiyevin  mühakimələri qarşısında Ermənistan prezidentinin hərdəmxəyal düşüncələri olduqca cılızdır.

Məruzəçi erməni millətçilərinin tarixi saxtalaşdırma işində mahir fırıldaqçı olmalarından və qarşılarına çıxan bütün mədəni-tarixi abidələri amansız bir cəlladlıqla  məhv  etmələrindən də bəhs etdi. Akademik R. Mehdiyevin fikirlərini dəstəkləyən professor X.Məmmədov tarixin atası sayılan Herodotun yazdığı mənbələrdən bəhrələnərək, ermənilərin dünyaya səpələnməsini faktlarla sübuta yetirməyə çalışdı və bildirdi ki, tarixi faktlar erməni prezidentinin bütün iddialarını əsaslı şəkildə rədd edir. 

Məruzəsinin sonunda professor X.Məmmədov müəllifin bir fikrini diqqətə çatdırdı. Müəllif yazır: "Dağlıq Qarabağı Ermənistana birləşdirmək mümkün olmamışdır və heç vaxt mümkün olmayacaqdır - nə 20 il bundan əvvəl, nə bu  gün, nə də 100 ildən sonra. Nə birbaşa, nə də qondarma "müstəqillik" sayəsində". Müəllifin bu fikrinə münasibət bildirən məruzəçi qeyd etdi ki, hörmətli akademikimizin söylədikləri tam reallıqdır. Çünki xalqımızın min illik qəhrəmanlıq tarixi, ər oğullarının rəşadəti, həmçinin bugünkü qüdrətli yeniləşən Azərbaycan və onun müdrik rəhbəri, Ali Baş Komandanımız İlham Heydər oğlu Əliyevin  məqsədyönlü siyasəti və dəyanəti bunu əminliklə deməyə əsas verir.

Məruzəçi sonda bildirdi ki, biz ziyalıların ən ümdə vəzifəsi nəinki xalqımızın tarixi keçmişini bilmək və ona sahib çıxmaq, eyni zamanda onu gələcək nəslə layiqincə çatdırmaq və vətənə layiqli vətəndaşlar tərbiyə etməkdir.

Sonra məruzə ətrafında çıxışlar dinlənildi.

Çıxış edənlər Azərbaycan Respublikası Prezidenti Administrasiyasının rəhbəri, akademik Ramiz Mehdiyevin "Gorus-2010: absurd teatrı mövsümü" kitabını informasiya müharibəsində erməni təbliğatına sarsıdıcı zərbə kimi yüksək dəyərləndirdilər.