Dünyada ekoloji problemlərin getdikcə artması təbiət və cəmiyyət münasibətlərinin tənzimlənməsi üçün təxirəsalınmaz tədbirlərin görülməsini tələb edir. Ekoloji problemlərin həlli, ilk növbədə, insanların şüurunda köklü dəyişikliklərin aparılmasından, onların ətraf mühitə və təbii sərvətlərə münasibətinin dəyişməsindən asılıdır.

2010-cu il Azərbaycanda "Ekologiya ili" elan olunmuşdur. Bu baxımdan biz müəllimlərin üzərinə çox böyük məsuliyyət düşür. Planetimizin və bəşəriyyətin yaşaması naminə insanlar təbii və antropogen təsirlərə məruz qalmış ətraf mühitin problemlərini öyrənməli və bu problemlərin birgə həll edilməsi üçün yollar axtarmalıdır. Bu yol məktəbdən başlayır. Ona görə də  biz çalışırıq ki, təhsillə bərabər, şagirdlərimizdə ətraf mühitə qarşı həssas münasibət formalaşdıraq, təbii, mədəni, tarixi-estetik dəyərlərin qorunması ruhunu onlara aşılayaq.

Məlum olduğu kimi, apreldə Bakıda ekologiya və qlobal fəlakətlərdən çıxış yollarından bəhs edən İNEPO-EUROASİA Ətraf Mühitin Mühafizəsi IV Beynəlxalq Layihə Olimpiadası keçirilmişdir.

Dünyanın 33 ölkəsindən 300-ə qədər layihənin təqdim edildiyi, 97-nin seçilərək münsiflər heyətinin müzakirəsinə verildiyi  olimpiadada Azərbaycandan 45 layihə finala vəsiqə almışdı. Sevindirici haldır ki, məktəbimizin iki şagirdi Aytən Camallı və Fəridə Gilmizliyeva da bu müsabiqədə iştirak etmişdir. Onların müsabiqəyə təqdim etdikləri layihə "Bioloji parçalanmaya məruz qalmış tullantıların kompastlaşdırılması" idi. Burada əsas məqsəd kimi müasir dövrdə kənd təsərrüfatında üzvi gübrələrə daha çox önəm verilməsi və ekoloji cəhətdən təmiz məhsul əldə edilməsi idi. Şagirdlər layihə ilə bərabər, stendlər və maket də təqdim etmişdilər.

Olimpiadada məktəbimizin şagirdlərinin iştirakı bir müəllim kimi məni və kollektivimizi sevindirmişdir.

Yeri gəlmişkən qeyd edim ki, ötən ilin mayında "Enerji və ətraf mühit" mövzusunda keçirilən müsabiqədə iştirak etmişəm. Müsabiqə Təhsil Nazirliyi, Ekologiya və Təbii Sərvətlər Nazirliyi, Norveç səfirliyi tərəfindən təşkil edilmişdi. Müsabiqədə "Enerji resurslarının istifadəsi üzrə məktəbli proqramı" çərçivəsində Bakı şəhəri də daxil olmaqla respublikamızın 11 bölgəsi iştirak etmişdir. Beynəlxalq müsabiqənin Azərbaycan turunda iştirak  etməklə  qiymətli  hədiyyə  və  sertifikata  layiq  görüldüm.  Bütün  bunları "Ekologiya ili"nə məktəbimizin töhfəsi hesab edirəm.

Məmləkət ƏFƏNDİYEVA,
Qax şəhər 4 nömrəli orta məktəbin coğrafiya müəllimi