Sentyabrın 15-də Azərbaycan Dövlət Pedaqoji  Universitetində  yeni dərs ilinin başlanması  ilə əlaqədar tədbir keçirildi.Tədbiri giriş sözü ilə  ADPU-nun rektoru, professor Yusif Məmmədov açaraq universitetə ilk dəfə qədəm qoyan I kurs tələbələrini və professor - müəllim heyətini  yeni dərs ilinin başlanması münasibətilə təbrik etdi.

Bildirildi ki, bu il ADPU-ya test üsulu ilə 10 fakültə üzrə əyani  şöbəyə 1395 , qiyabi şöbəyə isə 439 nəfər tələbə qəbul olunub. Eyni zamanda ADPU-nun magistraturasının əyani şöbəsinə 11 istiqamət,42 ixtisas üzrə 190,  qiyabi şöbəsinə isə 7 istiqamət, 22 ixtisas üzrə 120 nəfər qəbul edilib. Həmçinin yeni tədris ilində ADPU-ya Türkiyə Respublikasının Yüksək Öyrətim  Kurulu tərəfindən 5 ixtisas-riyaziyyat, kimya, biologiya, defektologiya və musiqi müəllimi ixtisasları üzrə 125 nəfər türkiyəli vətəndaşın  təhsil almağa  göndərilməsi  də  nəzərdə tutulur.

Sevindirici haldır ki, bu ildən respublikamızın ali təhsil müəssisələrinin yeni maliyyələşmə mexanizminə keçməsi ilə əlaqədar ADPU-ya 727 nəfər tələbə dövlət sifarişi əsasında qəbul edilmişdir.Bu yeniliklərlə yanaşı, universitetin tədris  korpuslarında yüksək  səviyyəli təmir-tikinti və abadlıq işləri  həyata keçirilmiş, maddi-texniki bazasının gücləndirilməsi və müasir informasiya-kommunikasiya texnologiyaları ilə təminatının daha da yaxşılaşdırılması üçün müvafiq işlər görülmüşdür.

Tədbirdə I kursa qəbul olunmuş tələbələr və  onların valideynləri də çıxış etdilər.  

Şakir CƏFƏROV