Sentyabrın 15-də Bakıdakı Heydər Əliyev adına liseydə "Bilik günü" ilə əlaqədar tədbir keçirildi. Tədbirdə liseyin müəllim-şagird kollektivi ilə yanaşı, Xətai Rayon İcra Hakimiyyətinin başçısı Razim Məmmədov, Təhsil Nazirliyi İctimaiyyətlə əlaqə şöbəsinin müdiri Bayram Hüseynzadə və digər qonaqlar iştirak edirdilər.

Tədbiri giriş sözü ilə açan liseyin direktoru Fikrət  Xəlilov mərasim iştirakçılarını salamlayaraq, "Bilik günü" münasibətilə onları təbrik etdi.  Ümummilli lider Heydər Əliyevin adını daşıyan liseyin açılışında çıxış edən Azərbaycan Respublikasının Prezidenti cənab İlham Əliyevin lisey haqqında fikirlərini diqqətə çatdıran F.Xəlilov liseydə hər cür şəraitin yaradıldığını və ulu öndərin adını daşıdığı üçün məsuliyyətlərinin ikiqat olduğunu, bu məsuliyyətin öhdəsindən  gəlmək üçün var gücləri ilə çalışdıqlarını qeyd etdi. O, ötən tədris ilində buraxılan məzunlar haqqında danışaraq bildirdi ki, 141 məzundan 20-si 600-dən çox, 11 nəfəri isə 650-dən çox bal toplamış, bir nəfər şagird Beynəlxalq Mendeleyev Olimpiadasının qalibi olmuşdur. Bununla yanaşı, liseyin şagirdləri respublikada və beynəlxalq arenalarda keçirilən olimpiada və müsabiqələrdə uğurla iştirak edərək təhsil ocağının adını uca tutmuşlar.  Respublika Prezidenti cənab İlham Əliyevin  sərəncamı ilə keçirilən "Ən yaxşı ümumtəhsil məktəbi" və "Ən yaxşı müəllim" müsabiqələrində liseyin uğurlu çıxışını qeyd edərək F.Xəlilov bildirdi ki, müsabiqənin birinci ilində liseyimiz "Ən yaxşı ümumtəhsil məktəbi" adını qazanmış, sonrakı illərdə isə 6 nəfər müəllimimiz "Ən yaxşı müəllim" müsabiqəsinin qalibi olmuşdur.

Sonra söz  Təhsil Nazirliyi İctimaiyyətlə əlaqə şöbəsinin müdiri Bayram Hüseynzadəyə verildi. O, liseyin kollektivini əlamətdar gün münasibətilə təbrik edərək təhsil naziri Misir Mərdanovun salamını və  təbrikini iştirakçılara çatdırdı. B.Hüseynzadə Azərbaycan təhsilinin ciddi inkişaf yolunda olduğunu və ulu öndər Heydər Əliyevin ideyaları əsasında dünya təhsil sisteminə inteqrasiya etdiyini vurğuladı. Liseyin fəaliyyətini yüksək qiymətləndirən natiq bu təhsil müəssisəsini Azərbaycan dövlətinin təhsilə olan münasibətinin güzgüsü adlandırdı və bir valideyn kimi liseyi seçməyinin təsadüfi olmadığını vurğuladı.

Tədbirdə çıxış edən Xətai RİH-in başçısı Razim Məmmədov respublikada gedən təhsil islahatlarından danışaraq təhsilə göstərdiyi diqqət və qayğıya görə ölkə Prezidenti cənab İlham Əliyevə minnətdarlığını bildirdi.  O, liseyin nəinki Xətai rayonunun, eləcə də respublikanın qabaqcıl təhsil müəssisələrindən olduğunu və gələcəyə doğru inamla  addımladığını  vurğulayaraq, pedaqoji  kollektivə  işlərində  uğurlar arzuladı. 

Niyazi RƏHİMOV