Hüseynov Elşən İbrahim oğlu 

1976-cı il iyunun 30-da Saatlı rayonunun Qıraqlı kəndində anadan olmuşdu. 1993-cü ildə kəndlərindəki orta məktəbi bitirdikdən bir il sonra Saatlı Rayon Hərbi Komissarlığı tərəfindən Milli Ordu sıralarına çağırılmışdı. Elşən xidmət etdiyi "N" saylı hərbi hissədə verilən bütün tapşırıqları vaxtında və dəqiq yerinə yetirdiyinə görə hamının hörmətini qazanmışdı. 1995-ci ilin məlum mart hadisələri zamanı o da Milli Ordu sıralarında öz vətəndaşlıq borcunu yerinə yetirərək Azərbaycanı parçalamaq istəyən nankorlara qarşı mübarizəyə qoşulmuş və qəhrəmanlıq nümayiş etdirmişdi.

E.Hüseynov 1995-ci il martın 17-də qeyri-qanuni silahlanmış, dövlət çevrilişinə cəhd edən bir qrup qiyamçı ilə qarşıdurmada qəhrəmancasına həlak olub.

Subay idi.

Azərbaycan Respublikası Prezidentinin 4 aprel 1995-ci il tarixli 307 nömrəli Fərmanı ilə Hüseynov Elşən İbrahim oğlu ölümündən sonra Azərbaycanın Milli Qəhrəmanı adına layiq görülüb.

Saatlı rayonunun Qıraqlı kəndində dəfn olunub. Saatlı rayon mərkəzi xəstəxanası onun adını daşıyır. 

Hüseynov Əfqan Qaraxan oğlu 

1963-cü il fevralın 24-də Bakı şəhərində anadan olmuşdu. 1978-ci ildə paytaxtdakı 109 nömrəli orta məktəbin səkkizinci sinfini bitirərək C.Naxçıvanski adına Hərbi Liseyə daxil olmuşdu. Burada təhsilini başa çatdırdıqdan sonra Bakı Ümumqoşun Komandirləri Məktəbinə qəbul olmuşdu. 1984-cü ildə bir zabit kimi təyinatla Simferopol şəhərinə göndərilmişdi. 1985-1987-ci illərdə Əfqanıstanda gedən döyüşlərdə iştirak etmiş, bir neçə dəfə ağır yaralanmışdı. O, 1992-ci ilin avqustunda yaranan Milli Qvardiya Alayına komandir təyin edilmişdi.

Ə.Hüseynov 1992-ci il noyabrın 1-də Qubadlı rayonunun Səfiyan və Quşçular kəndlərinin müdafiəsi zamanı qəhrəmancasına həlak olub.

Ailəli idi. Bir övladı var.

Azərbaycan Respublikası Prezidentinin 15 yanvar 1995-ci il tarixli 262 nömrəli Fərmanı ilə Hüseynov Əfqan Qaraxan oğlu ölümündən sonra Azərbaycanın Milli Qəhrəmanı adına layiq görülüb.

Bakı şəhərində Şəhidlər xiyabanında dəfn olunub. C.Naxçıvanski adına Hərbi Liseydə və Milli Qvardiya Qərargahında büstü qoyulub. 

Hüseynov Rövşən Şəmil oğlu 

1967-ci il fevralın 22-də Ağdam rayonunun Quzanlı kəndində anadan olmuşdu. 1984-cü ildə kəndlərindəki orta məktəbi bitirdikdən sonra Ağdam rayon Mədəniyyət evində çalışmışdı. 1985-ci ildə Bakı Dövlət Universitetinin fizika fakültəsinə daxil olmuş, 1985-1987-ci illərdə ordu sıralarında xidmət etmişdi. Rövşən 1992-ci ildə bir neçə tələbə dostu ilə  dövlət imtahanlarına üç ay qalmış təhsilini yarımçıq qoyaraq iki ay hərbi hazırlıq keçdikdən sonra Qarabağın ən qaynar döyüş bölgəsinə yola düşmüşdü. Goranboy istiqamətində Holandağ yüksəkliyi uğrunda gedən döyüşlərdə iştirak etmişdi.

R.Hüseynovun komandirlik etdiyi dəstə 1992-ci il mayın 11-də Mingəçevir bölüyünü mühasirədən çıxararkən o özü də qəhrəmancasına həlak olub.

Subay idi.

Azərbaycan Respublikası Prezidentinin 16 noyabr 1994-cü il tarixli 202 nömrəli Fərmanı ilə Hüseynov Rövşən Şəmil oğlu ölümündən sonra Azərbaycanın Milli Qəhrəmanı adına layiq görülüb.

Ağdam rayonunun Quzanlı kəndində dəfn olunub. Bakı Dövlət Universitetində büstü qoyulub. 

Hüseynov Sadiq Dayandur oğlu 

1961-ci il iyulun 29-da Ağcabədi rayonunun Xocavənd kəndində anadan olmuşdu. 1978-ci ildə kəndlərindəki orta məktəbi bitirmiş və 1980-ci ildə Xankəndi Pedaqoji İnstitutunun ibtidai metodika fakültəsinin qiyabi şöbəsinə daxil olmuşdu. Sadiq 1987-ci ildə institutu bitirərək doğma kəndlərinə qayıtmışdı. 1989-cu ildə Şuşa  Rayon  Daxili  İşlər  Şöbəsində  sahə  müvəkkili vəzifəsinə təyin edilmişdi. 1992-ci ildə ermənilər Şuşaya hücum edəndə o da polis  əməkdaşları  ilə  birlikdə  döyüş  meydanına atılmışdı.

1992-ci il aprelin 13-də erməni silahlı qüvvələri Şuşanı ağır raket atəşinə tutan zaman S.Hüseynov yaralı yoldaşlarını xilas edərkən qəhrəmancasına həlak olub.

Ailəli idi. Bir övladı var.

Azərbaycan Respublikası Prezidentinin 8 oktyabr 1992-ci il tarixli 264 nömrəli Fərmanı ilə Hüseynov Sadiq Dayandur oğlu ölümündən sonra Azərbaycanın Milli Qəhrəmanı adına layiq görülüb.

Ağcabədi rayonunun Xocavənd kəndində dəfn olunub. Xocavənd kənd orta məktəbi onun adını daşıyır. 

Hüseynov Şahlar İsa oğlu 

1968-ci il noyabrın 26-da Qərbi Azərbaycanın Razdan rayonunun Hankavan kəndində anadan olmuşdu. 1985-ci ildə doğma kəndlərində orta təhsilini rus dilində başa çatdırmış və peşə məktəbində sürücülük peşəsinə yiyələnmişdi. Şahlar 1986-1988-ci illərdə Moskva şəhərində hərbi xidmətdə olmuşdu. 1991-ci ildən isə Gəncə Alüminium Oksidi İstehsalat Birliyində çilingər işləməyə başlamışdı. 1992-ci ildə Gəncə batalyonunun tərkibində erməni işğalçılarına qarşı döyüşlərdə fəal iştirak etmişdi.

Ş.Hüseynov 1992-ci il aprelin 10-da Marquşevan kəndində uzun sürən döyüşdə böyük şücaət göstərərək qəhrəmancasına həlak olub.

Subay idi.

 Azərbaycan Respublikası Prezidentinin 7 iyun 1992-ci il tarixli 833 nömrəli Fərmanı ilə Hüseynov Şahlar İsa oğlu ölümündən sonra Azərbaycanın Milli Qəhrəmanı adına layiq görülüb.

Gəncə şəhərində Şəhidlər xiyabanında dəfn olunub. Gəncə şəhərində adına küçə var. 

Milli Qəhrəmanlar Beynəlxalq İnformasiya
Mərkəzinin materialları əsasında
hazırladı: Ədalət DAŞDƏMİRLİ