Konfransı giriş sözü ilə açan rektor, akademik İsa Həbibbəyli qeyd etmişdir ki, Rəsul Rza yaradıcılığı timsalında 60-cı illər ədəbiyyatındakı novatorluq, milli məfkurənin cəsarətli təbliği ümummilli lider Heydər Əliyevin keçmiş sovetlər dövründə Azərbaycan ədəbiyyatının, mədəniyyətinin inkişafı istiqamətində yürütdüyü məqsədyönlü siyasətin bəhrələri idi. Xalq şairi Rəsul Rzanın anadan olmasının 100 illiyinin keçirilməsi ilə bağlı Azərbaycan Respublikasının Prezidenti İlham Əliyevin 14 yanvar 2010-cu il tarixli Sərəncamı Rəsul Rza yaradıcılığına, bütövlükdə milli poeziyaya verilən yüksək qiymət kimi dəyərləndirilmişdir. Tanınmış ədəbiyyatşünas xalq şairi Rəsul Rzanın Azərbaycan poeziyasında sərbəst vəznin yaradıcısı olduğunu, V.Səmədoğlu, Ə.Kərim, İ.İsmayılzadə kimi şairlərin məhz bu böyük sənətkarın məktəbinin yetirmələri olduğunu vurğulamışdır.

Azərbaycan ədəbiyyatı kafedrasının professoru, filologiya elmləri doktoru Yavuz Axundlu şairin əsərlərinin fəlsəfəsindən, poetik məna çalarlarından söz açmış, onun "Qızılgül olmayaydı..." poemasının milli poeziyanın repressiya qurbanlarına həsr olunmuş ilk və ən mükəmməl nümunələrindən biri olduğunu söyləmişdir. Ədəbiyyatşünas alim Rəsul Rzanın publisistik yaradıcılığını təhlil etmiş, onun Böyük Vətən müharibəsi illərində hərbi müxbir kimi vətənpərvərlik ruhlu məqalə və şeirlər yazdığını söyləmişdir.

Kafedranın baş müəllimi, filologiya elmləri namizədi Seyfəddin Eyvazov "Rəsul Rza yaradıcılığında forma və məzmun vəhdəti", tarix-filologiya fakültəsinin dekanı, filologiya elmləri namizədi, dosent İman Cəfərli "Rəsul Rza yaradıcılığı və satirik ədəbi irs", Naxçıvan Müəllimlər İnstitutunun tərbiyə işləri üzrə prorektoru, filologiya elmləri doktoru Sədaqət Həsənova "Rəsul Rza əsərlərinin dil xüsusiyyətləri" mövzularında məruzə etmişlər.

Tələbələrin ifasında Rəsul Rza şeirlərinin bədii qiraəti poeziyasevərlər üçün əsl sovqat olmuşdur.

Konfransda Rəsul Rzanın həyat və yaradıcılığını, ədəbi irsini əks etdirən fotoslaydlar və kitab sərgisi nümayiş etdirilmişdir.

Mehriban SULTAN