Bakıdakı  31 nömrəli  orta məktəbdə  1941-1945-ci illər  Böyük Vətən  müharibəsində qələbənin  65-ci  ildönümünə  həsr olunmuş tədbir keçirildi.Tədbiri giriş  sözü ilə açan məktəbin direktoru Şükufə  Məmmədsalahova faşist Almaniyası  üzərində çalınan qələbənin təkcə bizim üçün deyil, dünyanın bütün sülhsevər insanları  üçün  tarixi hadisə olduğunu diqqətə çatdırdı.

Sonra  məktəblilər  vətən, müharibə, sülh, torpaq  haqqında şeirlər söylədilər, mahnılar oxudular, rəqs etdilər, səhnəciklər göstərdilər.

Söz  veteranlara verildi. Azərbaycan Respublikası  Veteranlar Şurasının sədri İslam Əfəndiyev, 416-cı Taqanroq   diviziyasının döyüşçüsü  Əmiralı  Əmiralıyev  və Qarabağ müharibəsi veteranı,  gənclərin çağırışaqədərki hazırlıq üzrə rəhbəri  Novruz  Babayev müharibənin ağrılı - acılı günlərindən, keçdikləri şərəfli döyüş yolundan, şahidi olduqları  bir çox  dəhşətli anlardan bəhs etdilər.

Sonda  Əmiralı  Əmiralıyev  qələbənin əldə edilməsində  Azərbaycan  xalqının  qəhrəmanlığını özündə əks etdirən "Mənalı ömür yolu" kitabını məktəbin pedaqoji kollektivinə hədiyyə etdi.  Veteran onlara  göstərdiyi diqqət və qayğıya görə bütün veteranlar adından dövlət başçısı İlham Əliyevə öz minnətdarlığını ifadə etdi.

Sifai SƏFƏROVA