Təhsil Portalında (www.edu.az) yerləşən Elektron Dərslər İdarəetmə Proqramı AeL-ə loqo-linkinə daxil olan valideyn şagirdin qiymətləri və davamiyyəti haqqında məlumatları öyrənə bilər. "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində yaradılan təhsil portalında bu məlumatlar  valideynin elektron nəzarət səhifəsində yerləşdirilir.

Elektron nəzarət səhifəsində şagirdin Məktəbli kitabçası və Davamiyyət jurnalı yerləşdirilmişdir. Burada valideynlər şagirdin qiymətləri, davamiyyəti haqqında məlumat əldə edə bilərlər. Bundan əlavə, proqram vasitəsilə məktəbin direktorluğu, müəllimləri və digər valideynlər ilə interaktiv ünsiyyət saxlamaq, məktəbin fəaliyyəti ilə bağlı elanlar (valideyn iclasları, yığıncaqlar, iməciliklər) ilə tanış olmaq imkanı da vardır. Tədrisin idarəolunmasının avtomatlaşdırılması qiymətlərin onlayn olaraq avtomatik məktəb idarəetmə proqramından daxil edilməsinə şərait yaradır. Bu isə şagirdə qiymət qoyulduğu anda valideynin bu məlumatı İnternet vasitəsilə görə bilməsinə  imkan verir.

Proqram təminatı hər bir valideynə yalnız onun övladının qiymətlərinə elektron jurnalda baxmaq imkanı yaradır. Valideynlər üçün nəzarət səhifəsinin olması gündəlikləri mütəmadi yoxlama prosedurunu da aradan qaldırır. Həmçinin, elektron nəzarət səhifəsini informasiya nöqteyi-nəzərindən valideyn iclasında iştirakla müqayisə etmək olar.

Valideyn iclaslarında iştirak edə bilməyənlər bütün məlumatları nəzarət səhifəsindən əldə edə biləcəklər.

Şakir CƏFƏROV