Uşaq futbolunun inkişafı, istedadlı uşaqların üzə çıxarılması, futbolun kütləviliyinin təmin olunması məqsədilə AFFA tərəfindən ilk olaraq Bakıda başlanan "Məktəbli kuboku" turniri sentyabrın 25-də Qəbələdə start götürəcəkdir.

AFFA ilə "Qəbələ" klubunun birgə təşkilatçılığı ilə keçiriləcək "Məktəbli kuboku"nda Qəbələdə yerləşən 36 məktəbin 1998-1999-cu illər təvəllüdlü şagirdlərindən ibarət komandalar mübarizə aparacaqlar.

Əsasnaməyə görə, komandaların sifariş ərizəsinə 10 futbolçunun - onlardan 2-si qız olmalıdır - adı daxil ediləcəkdir. Hər komandanın start heyətində 1 qızın olması mütləqdir. Hər birində 6 komanda olmaqla futbolçular 6 qrupda mübarizə aparacaqlar.

Oyunların keçiriləcəyi meydançalar, məktəblilərin oyuna gətirilməsi "Qəbələ" klubu tərəfindən təmin olunacaqdır.

Bütün komandalar oyunlara AFFA-nın təqdim etdiyi formalarda çıxacaqlar. Qalib və mükafatçılara AFFA-nın hədiyyələri - toplar, xatirə medalları və kubok təqdim olunacaqdır.