Salyan rayonunun Xurşud kəndində Yaponiya hökumətinin "Ot kökləri və insan təhlükəsizliyi" Qrant Yardımı Proqramı çərçivəsində 200 şagird yerlik məktəb binası tikilib istifadəyə verilmişdir.

Bu münasibətlə müəllim və şagirdləri təbrik edən rayon icra hakimiyyətinin başçısı Əliağa Hüseynov son 5 ildə rayonda 10 yeni məktəb binasının, 8 məktəb üçün 37 əlavə sinif otağının tikildiyini, 11 məktəb, 5 uşaq bağçasının əsaslı təmir olunduğunu bildirmişdir. Yeni dərs ili ərəfəsində məktəblərdə cari təmir işləri aparılmış, yeni avadanlıq alınmışdır. Bütün məktəblər dərsliklə təmin olunmuşdur.

Ali məktəblərə qəbulun nəticələrinə görə Salyanın birincilər sırasında olduğunu qeyd edən təhsil nazirinin müavini İsgəndər İsgəndərov yeni dərs ilində müəllim və şagirdlərə uğurlar arzulamışdır.

Yaponiyanın ölkəmizdəki səfiri Masamitsu Oki "Ot kökləri və insan təhlükəsizliyi" Qrant Yardımı Proqramı çərçivəsində həyata keçirilən layihələr barədə məlumat verərək, onların bir hissəsinin təhsil sahəsi ilə bağlı olduğunu bildirmişdir.

Həmin gün Hacıqabulun Kürsülü kəndində Yaponiya və Azərbaycan hökumətinin əməkdaşlığı nəticəsində həyata keçirilən müvafiq layihə çərçivəsində inşa edilmiş yeni məktəb binası istifadəyə verilmişdir.