Son illər təhsilimizdə baş verən yeniliklər, təlimin təşkilinə innovativ yanaşmalar, onun forma və üsullarının təkmilləşdirilməsi yönündə atılan addımlar müəllimlərin fəallığını artırmış, yaradıcı axtarışlarını gücləndirmişdir. Hazırda təhsil müəssisələrimizdə daha çox tətbiq olunan fəal təlim, müasir, interaktiv təlim metod və üsulları, qeyri-ənənəvi dərslər və bir çox digər innovasiya elementlərini məhz həmin axtarışların nəticələri kimi qiymətləndirmək olar. İndi dərslərini fəal təlimin prinsip və tələbləri əsasında quran, təlimdə yeni texnologiyalardan geniş istifadə edən, işinə yaradıcı yanaşan müəllimlər çoxdur. Belə müəllimlərdən biri də Bakı şəhərindəki 30 nömrəli orta məktəbin Azərbaycan dili və ədəbiyyat müəllimi Şəhla Mirzəyevadır. Gənc müəllim daim fəal təlim metodlarından tədris prosesində istifadənin yollarının axtarışındadır. Onlara yaradıcı yanaşır, hər mövzuya uyğun metod və üsulların seçilməsində və tətbiqində maraqlı təcrübəyə malikdir.

Ş.Mirzəyeva bu təcrübəsini  "açıq dərs" verməklə, pedaqoji mətbuat vasitəsi ilə digər həmkarları ilə də tez-tez bölüşür. Onun iş təcrübəsinə dair məqalələri, metodik tövsiyələri vaxtaşırı olaraq "Azərbaycan müəllimi" qəzetində, "Azərbaycan dili və ədəbiyyatı tədrisi" jurnalında dərc edilir və həmkarları tərəfindən rəğbətlə qarşılanır.

Yaradıcı müəllimin həmin materiallarının, əsasən də metodik tövsiyələrinin toplandığı ilk kitabı bu günlərdə işıq üzü görmüşdür. "Azərbaycan dili və ədəbiyyatının tədrisində yeni təlim texnologiyalarından istifadə" adlanan bu kitabda (Adiloğlu, Bakı, 2010. Redaktoru Məhəmməd Baharlı) Ş.Mirzəyevanın Azərbaycan dili və ədəbiyyatdan müxtəlif mövzuların tədrisində yeni təlim texnologiyalarının tətbiqi imkanlarını açıb göstərən 5 metodik tövsiyəsi yer almışdır. Kitabına yazdığı "giriş"də müəllif fəal dərsin səmərəliliyini artırmağı təmin edən şərtlərdən, dərsin quruluşundan söz açır, "fəal dərsin induktiv və deduktiv tədqiqat" kimi 2 növünün daha çox yayıldığını qeyd edir, oxuculara hər iki dərs nümunələrinin təqdim olunduğunu bildirir. Yazılarda maraqlı tövsiyələr irəli sürülür ki, onlardan da hər bir müəllimin faydalana biləcəyi şübhəsizdir. 

Y.ƏLİYEV