"Microsoft" korporasiyası tərəfindən dünyada təbliğ edilən və müəllimlər üçün nəzərdə tutulmuş "Həmkara dəstək" proqramı Azərbaycanda tətbiq ediləcəkdir.

"Mədəd" təşkilatının icraçı direktoru Elbrus Zərbəliyevin verdiyi məlumata görə, Azərbaycanın bu proqramda iştirakı "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı"na uyğun olaraq Azərbaycan Respublikası Təhsil Nazirliyinin "Microsoft-Azərbaycan" ilə imzalanmış "Təhsildə əməkdaşlıq" Anlaşma memorandumu çərçivəsində həyata keçiriləcəkdir.

E.Zərbəliyev bildirdi ki, "Həmkara dəstək" proqramı məktəblərdə fəal müəllimlərin təlimçi rolunu yerinə yetirmələri və həmkarlarına dəstək göstərmələri məqsədi ilə yeni bilik və bacarıqlarının daha da təkmilləşdirilməsinə yönəlmişdir.

Təlim prosesi Azərbaycanda "Həmkara dəstək" proqramının reallaşması ilə məşğul olan "Mədəd"in təşkilatçılığı ilə həyata keçiriləcəkdir. "Həmkara dəstək" proqramı çərçivəsində fəaliyyət göstərən təlimçi-müəllim məktəblərdə çalışan digər müəllimlərə informasiya texnologiyalarının tədrisdə istifadəsi üzrə praktiki məsləhətlər verəcəkdir.

Bu zaman hər bir məktəbdə belə təlimçi-müəllimin olması tədrisdə İKT-nin istifadəsini asanlaşdıracaqdır. Proqramda iştirak etmək üçün informasiya-kommunikasiya texnologiyalarını tədrisdə daha  effektiv və geniş tətbiq edən metodist-müəllimlər və yaxud təcrübəli müəllimlər cəlb olunacaqlar.

Eyni zamanda "Həmkara dəstək" proqramı çərçivəsində təlimçi-müəllim kimi fəaliyyət göstərəcək pedaqoji heyətin üzvləri üçün "Mədəd" təşkilatı tərəfindən xüsusi treninqlərin təşkili də planlaşdırılır. 

Şakir CƏFƏROV