27 sentyabr - 1 oktyabr tarixlərində Azərbaycan müəllimləri Moskvada keçiriləcək "İntel" şirkətinin "1 şagird - 1 kompüter elektron mühitinin təşkili" mövzulu treninqində iştirak edəcəklər. Treninqlər Azərbaycanın da iştirak etdiyi "İntel"-in "1 şagird - 1 kompüter" qlobal layihəsi çərçivəsində təşkil olunacaq. "İntel" tərəfindən master-təlimçi (tyutor) kimi sertifikatlaşdırılacaq treninqlərdə iştirak etmiş müəllimlər gələcəkdə eyni kursları Azərbaycanda keçirəcəklər.

Treninqin məqsədi müxtəlif qrupların (məktəblilər, valideynlər, müəllimlər, məktəbin rəhbərliyi) maraqlarının nəzərə alınması ilə məktəbin tədris prosesində "Classmate PC" məktəb noutbukunun tətbiqi prosesini modelləşdirməkdir.  Qeyd etmək lazımdır ki, treninq "1 şagird - 1 kompüter" elektron tədris modeli çərçivəsində artıq fəaliyyətə başlayan və ilkin İKT bacarıqlarına malik olan müəllimlərə istiqamətlənir.

Gələcəkdə Azərbaycan müəllimlərinin bir il ərzində sözügedən layihəni dəstəkləməsi və  bu  müddət  ərzində  ölkə  müəllimləri üçün  treninqlərin  keçirilməsi  planlaşdırılır.

Qeyd edək ki, Azərbaycan müəllimləri "İntel"-in təşəbbüslərində Azərbaycan Respublikasının Təhsil Nazirliyi və "İntel" korporasiyası arasında imzalanmış Anlaşma Memorandumu çərçivəsində iştirak edirlər. "1 şagird - 1 kompüter" layihəsi "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində həyata keçirilir.

Şakir CƏFƏROV