İyunun 22-də Təhsil Nazirliyində ölkəmizin ümumtəhsil məktəblərinin XI siniflərində keçirilmiş buraxılış imtahanlarının nəticələrinə həsr olunmuş mətbuat konfransı keçirildi.

Təhsil naziri Misir Mərdanov konfransı açaraq  KİV nümayəndələrini salamladı, dəvəti  qəbul edib gəldiklərinə görə onlara minnətdarlığını bildirdi. Ümumtəhsil məktəblərinin XI siniflərində mərkəzləşdirilmiş qaydada keçirilmiş buraxılış imtahanlarının nəticələri ilə media nümayəndələrini tanış edən nazir  imtahanlarda ölkə üzrə 88815 nəfərin (96,54 faiz) iştirak etdiyini və onlardan 74832- sinin (84,26 faiz) müvəffəq qiymət aldığını söylədi. Təhsil naziri əvvəlki illərlə müqayisədə müvəffəq qiymət alanların sayının çoxaldığını diqqətə çatdırdı.  

Qeyd olundu ki, Bakı şəhərinin 11 rayonundakı, Təhsil Nazirliyinə tabe olan və ali təhsil müəssisələrinin nəzdindəki məktəblər üzrə imtahanlarda 23222 nəfər XI sinif şagirdindən 23037-si (99,20 faiz) iştirak edib. Onlardan 21441 nəfər (93,07 faiz) müvəffəq qiymət alıb.

Gəncə, Mingəçevir, Naftalan, Şirvan və Sumqayıt şəhərləri üzrə imtahanlarda  8168 şagirdin iştirakı nəzərdə tutulsa da, 8048-i (98,53 faiz) bu  imtahanlara qatılıb və 7420-si  (92,20 faiz) müsbət nəticə göstərib.  Ölkəmizin 59 kənd rayonunun ümumtəhsil məktəblərinin XI siniflərini bitirmiş  60152 nəfərdən  57273-ü (95,21 faiz) imtahanda iştirak edib və onlardan 45515-i (79,47 faiz) müvəffəqiyyət qazanıb.

Bakı şəhəri məktəbləri  üzrə imtahanlarda 24933, Sumqayıt şəhəri üzrə isə 4083 nəfər iştirak edib. Bakı şəhəri üzrə ümumi nəticə 92,74 faizdir.  Bakı şəhərinin rayonları arasında ən yüksək nəticə - 95,45 faiz Xətai rayonuna  məxsusdur. Nazir paytaxtın digər  rayonlarında, eləcə də respublikanın bölgələrində keçirilən  imtahanların nəticələri ilə bağlı statistik rəqəmləri açıqladı,  bu il 14 minə yaxın XI sinif şagirdinin  bir və ya bir neçə fəndən qeyri-kafi qiymət aldığını bildirdi.

Verilən məlumatdan aydın oldu ki, cari dərs ilində  müxtəlif fənn olimpiadaları və beynəlxalq səviyyəli  idman yarışlarının qalibi olduğuna görə 51 və müvafiq qaydalar əsasında - xəstə olmaları, evdə təhsil almaları  və digər səbəblərdən isə  551 nəfər  buraxılış imtahanlarından azad olunub.

Nazir  eksternat qaydasında imtahan vermək  üçün də hər cür şəraitin yaradıldığını, əsas və orta təhsil  kursu üzrə 103, habelə bu il   buraxılış imtahanlarında üzrlü səbəbdən iştirak etməyən 13 nəfərin iyunun 23-də həmin qayda ilə  imtahan verəcəyini bildirdi.

Təhsil naziri  imtahanlarla bağlı yaradılmış apelyasiya komissiyasının fəaliyyətə başladığını qeyd etdi.  Şagirdlərin apelyasiya müraciətlərinin təhsil aldıqları rayon və şəhərlərin təhsil şöbələrində  qəbul edildiyini deyən nazir  Bakı şəhərində  həmin komissiyanın 276 nömrəli məktəbdə təşkil olunduğunu söylədi. Qeyd olundu ki, yerlərdə imtahanlarla bağlı ərizə və şikayətlərin qəbulu 2010-cu il 26 iyun tarixinədək davam edəcək.

Mətbuat konfransında daha sonra bildirildi ki, ötən tədris illərində mərkəzləşdirilmiş qaydada keçirilmiş buraxılış imtahanlarında bir və ya bir neçə fəndən qeyri-kafi qiymət almış  8586 nəfər imtahan vermək üçün müraciət edib, 6413 nəfərin  (74,69 faiz) orta təhsil kursu üzrə  təkrar buraxılış imtahanlarında iştirakı təmin olunub. Onlardan  3852 nəfər (60,07 faiz) müvəffəq, 2173 nəfər (25,31 faiz) isə qeyri-kafi qiymət alıb. Nazir orta təhsil kursu üzrə buraxılış imtahanlarının nəticələrinin  yekunlaşdırıldığını, imtahan aparılan fənlər üzrə  imtahan verənlərin attestatına yazılan yekun qiymətləri barədə məlumatların Təhsil Nazirliyinin İnternet saytının  (www.edu.gov.az) imtahan bölməsində yerləşdirildiyini və bu il tətbiq edilən yeniliklərdən birinin  gənclərin İnternetdən  imtahanların nəticələri ilə yanaşı, onlara verilən attestatların seriya və nömrələrini də öyrənə bilmələri olduğunu söylədi. Təhsil naziri  Bakı və Sumqayıt şəhərlərində artıq  attestatların verilməsinə başlanıldığını diqqətə çatdırdı.

Nazir Misir Mərdanov ölkənin orta  ümumtəhsil məktəblərində mərkəzləşdirilmiş qaydada keçirilən buraxılış imtahanlarına ildən -ilə daha məsuliyyət və tələbkarlıqla yanaşıldığını deyərək, bunun şagirdlərin imtahan nəticələrinə öz müsbət təsirini göstərdiyini söylədi. Orta təhsil kursu üzrə mərkəzləşdirilmiş qaydada keçirilən buraxılış imtahanlarının əhəmiyyətinə toxunan nazir  onu da bildirdi ki, XI sinfin attestatını almaq üçün şagird minimum biliyə və bacarığa malik olmalıdır.

Nazir  daha sonra ölkə təhsilində tətbiq edilən yeni qiymətləndirmə sistemindən, məktəbdaxili,  milli  və beynəlxalq qiymətləndirmə proqlamlarının həyata keçirilməsindən, bu sahədə görüləsi vacib işlər  barədə ətraflı söz açdı.

Konfransın sonunda  təhsil naziri Misir Mərdanov KİV nümayəndələrinin çoxsaylı suallarını cavablandırdı.

Samirə KƏRİMOVA