İyunun 22-də Bakı Pedaqoji Kadrların İxtisasartırma və Yenidənhazırlanma İnstitutunda (BPKİYİ) "Heydər Əliyev siyasəti və vətəndaş mövqeyinə dövlət qayğısı" mövzusunda elmi-praktik konfrans keçirildi.

Tədbirdə institutun professor-müəllim heyəti, BDU-nun Sosiologiya kafedrasının müdiri, fəlsəfə elmləri doktoru, professor İzzət Rüstəmov, ADPU-nun Ümumi tarix kafedrasının müdiri, tarix elmləri doktoru, professor Vəli Əliyev və digər qonaqlar iştirak edirdilər.

Tədbiri giriş sözü ilə açan BPKİYİ-nin rektoru, fizika-riyaziyyat elmləri doktoru, professor Asəf Zamanov ulu öndər Heydər Əliyevin həyat və fəaliyyətindən söz açaraq, dahi şəxsiyyətin müasir Azərbaycan dövlətinin yaranmasında və dünya ölkələri içərisində tanınmasında göstərdiyi misilsiz xidmətlərindən danışdı. Qeyd edildi ki, müstəqilliyimizin ilk illərində yaranmış xaos və hərc-mərclik dövlətimizi məhv olmaq təhlükəsi qarşısında qoymuşdu. Belə bir şəraitdə xalqın təkidi ilə ikinci dəfə hakimiyyətə gələn Heydər Əliyev müdrik siyasəti və qəti tədbirləri sayəsində dövləti məhv olmaq təhlükəsindən xilas etdi. Ümummilli lider Heydər Əliyev Azərbaycan xalqının tarix boyu yetişdirdiyi nadir siyasətçidir. Böyük tarixi şəxsiyyət, ulu öndər Heydər Əliyev nəinki xalqımızın, bütün dünya xalqlarının qəlbində daim yaşayacaqdır.

Sonra söz professor İzzət Rüstəmova verildi. O, Heydər Əliyevin rəhbərliyi altında çalışdığını və ulu öndərlə dünyanın bir çox ölkələrində olduğunu vurğulayaraq, xatirələrini tədbir iştirakçıları ilə bölüşdü. Heydər Əliyevin dünyada böyük nüfuza və hörmətə malik olduğunu qeyd edən İ.Rüstəmov onunla hər bir azərbaycanlının fəxr etdiyini bildirdi. Dövlətimizin durmadan artan uğurlarının qazanılmasında ümummilli liderin xidmətlərini yüksək qiymətləndirdi. Bu gün möhtərəm Prezidentimiz İlham Əliyev ulu öndərin siyasi kursunu uğurla davam etdirir.

Tədbirdə çıxış edən professor Vəli Əliyev dövlətçilik tarixindən danışdı. O, Heydər Əliyevi müasir Azərbaycanımızın qurucusu olduğunu və onun ideyaları əsasında formalaşan dövlətimizin sürətlə inkişaf etdiyini bildirdi. Ömrünü Vətəninə və dövlətinə həsr edən ulu öndərin bütün sahələrə olduğu kimi, təhsil sahəsinə verdiyi töhfələrdən danışan natiq, Heydər Əliyevin elm adamlarına və təhsil işçilərinə göstərdiyi diqqət və qayğını yüksək qiymətləndirdi.

Digər çıxış edənlər ümummilli lider Heydər Əliyevin misilsiz tarixi xidmətlərindən və azərbaycançılıq ideyalarından danışdılar. 

Niyazi RƏHİMOV