İKT informasiya mərkəzindən bildirmişlər ki, "Elektron təhsil" respublika müsabiqəsinə 347 layihə təqdim olunmuşdur.

Müsabiqə "Microsoft Azərbaycan" şirkəti, "İntel" korporasiyasının "Gələcək üçün təhsil" proqramı, "AZEDUNET", "Ultra", "Azerfon-Vodafone", HP şirkətləri, "Mədəd" təşkilatı tərəfindən dəstəklənir.

Müsabiqə "Müasir məktəbdə elektron tədris resursları" və "Təhsildə İnternet texnologiyaları" istiqamətləri üzrə təşkil olunmuşdur.

"Müasir məktəbdə elektron tədris resursları" istiqaməti üzrə "Fənlərin tədrisində İT-dən istifadə üzrə ən yaxşı metodika" nominasiyası üzrə 119, "İbtidai təhsil sistemində İT-dən istifadə üzrə ən yaxşı metodika" nominasiyası üzrə 63, "Elektron tədris vəsaitlərindən istifadə edilməklə qurulan tədris prosesinin ən yaxşı modeli" nominasiyası üzrə 124 layihə, "Təhsildə İnternet texnologiyaları" istiqamətinin "Təhsildə İnternet resursları" nominasiyası üzrə 23, "Müəllimlərin bloqları" nominasiyası üzrə isə 11 layihə təqdim edilmişdir.

Müsabiqənin əsas məqsədi tədris prosesində elektron tədris resurslarından, İnternet texnologiyalarından istifadəni populyarlaşdırmaq, bu sahədə təhsil ictimaiyyətini məlumatlandırmaq, tədris məqsədləri üçün İnternetdən istifadənin yeni formalarını üzə çıxarmaq, dərs prosesində informasiya texnologiyalarından fəal istifadə edən müəllimləri həvəsləndirməkdir.

İki mərhələdə keçirilən səsverməni Təhsil Nazirliyi tərəfindən peşəkarlardan və mütəxəssislərdən formalaşdırılan münsiflər heyəti aparacaqdır. Müsabiqədə 5 nominasiyanın hər biri üzrə qalib gələnlərə noutbuklar, netbuklar və digər mükafatlar təqdim olunacaqdır.  

AzərTAc