Mayın 18-də  Azərbaycan Texniki  Universitetində xalq şairi, əməkdar incəsənət xadimi, Milli  Aviasiya Akademiyasının kafedra müdiri, professor  Nəriman Həsənzadə ilə  görüş keçirildi. Tədbiri universitetin rektoru, professor Havar Məmmədov açaraq şairin  həyat yolu, zəngin yaradıcılığı barədə ətraflı məlumat verdi. Rektor görkəmli şairin Azərbaycan ədəbiyyatına, xüsusən poeziyamıza verdiyi töhfələri yüksək dəyərləndirdi. Şairin  80-ci illərdə qələmə aldığı "Nəriman" poemasını və "Atabəylər" dramını müasir Azərbaycan ədəbiyyatında tarixi hadisə kimi qiymətləndirdi.

Sonra  Milli Aviasiya Akademiyasının kafedra müdiri, hüquq elmləri doktoru, professor İbrahim Quliyev, Azərbaycan Dövlət İqtisad Universitetinin kafedra müdiri, professor Maarifə Hacıyeva, şair Ramiz Məmmədzadə, "Azərbaycan Cümhuriyyəti" qəzetinin redaktoru Ramin Qurban çıxışlarında  Nəriman  Həsənzadənin yaradıcılığında  Azərbaycan xalqının tarixinin, mədəniyyəti və incəsənətinin təbliğinə geniş yer verildiyini vurğuladılar.

Xalq şairi N.Həsənzadə tələbələrin suallarını ətraflı cavablandırdı və  lirik şeirlərini oxudu.

Görüş tələbələrin şairin şeirləri əsasında hazırladıqları ədəbi-bədii kompozisiya ilə başa çatdı.

 Sifai  SƏFƏROVA