Orta ümumtəhsil məktəblərində İKT-dən istifadə genişləndiyindən şagirdlərdə informasiyalaşmış cəmiyyətin tələblərinə uyğun zəruri məlumatlarla işləmə bacarıqları və kompüterdən istifadə  vərdişləri  xeyli artmışdır.

229 nömrəli orta məktəbin direktoru  Fəridə Bağırova  bildirdi ki, rəhbərlik etdiyi  təhsil müəssisəsində iki kompüter otağı yaradılıb. Tədris zamanı şagirdlərdə ətraf aləmi informasiya baxımından təhlil və qərar  qəbul etmək bacarıqlarının  formalaşdırılmasına ciddi diqqət yetirilir. Hazırda I və II siniflərdə oxuyan  şagirdlər informatika müəllimləri Bahar Bayramova və Sultanə Qurbanovanın gərgin əməyi sayəsində İKT-nin sirlərinə həvəslə yiyələnirlər.

242 nömrəli orta məktəbin direktoru Akif Rəsulov isə   qeyd etdi ki, cari tədris ilinin əvvəlindən I və II  siniflərin informatika müəllimi Saçlı Əhmədova ilk gündən şagirdlərdə   bu  fənnə qarşı böyük  maraq oyadıb. Şagirdlər artıq kompüterlə sərbəst davranır və onda lazımi əməliyyatları yerinə yetirirlər. Həm də   şagirdlərdə alqoritmik təfəkkür elementlərinin yaradılması və  kompüter texnikasından istifadə etmək qabiliyyətinin formalaşdırılmasına nail olunur. 

Şakir CƏFƏROV