Mayın 18-də "Caspian Plaza" biznes mərkəzində Azərbaycan hökumətinin Dünya Bankının dəstəyi ilə həyata keçirdiyi "Dövlət investisiyaları üzrə kadr potensialının gücləndirilməsi layihəsi" çərçivəsində Azərbaycan Respublikası Təhsil Nazirliyi  Dünya Bankı Layihələrinin Əlaqələndirmə Qrupu tərəfindən beynəlxalq maliyyə hesabatları standartları ilə bağlı təlimlərə başlanılması münasibətilə mərasim keçirildi.

Məlumat üçün bildirək ki, ölkəmizdə Dünya Bankının dəstəyi ilə "Dövlət investisiyaları üzrə kadr potensialının gücləndirilməsi layihəsi"nin icrasına başlanılıb. Layihənin icraçı agentliyi kimi Azərbaycan Respublikasının Təhsil Nazirliyi seçilib. 2009-cu il 3 noyabr tarixində adıçəkilən layihə qüvvəyə minib. Layihənin ümumi dəyərini  10 milyon ABŞ dolları təşkil edir. Həmin vəsaitdən 8 milyon ABŞ dolları Dünya Bankının krediti , 2 milyon ABŞ dolları isə Azərbaycan hökumətinin maliyyəsi hesabına formalaşıb. Layihəyənin əsas komponentləri bunlardır: ümumi mövzular üzrə potensial quruculuğu, sektorlar üzrə potensial quruculuğu,potensial quruculuğunu  dəstəkləyən fəaliyyətlər və layihənin icrası.

GRBS şirkəti tərəfindən aparılan beynəlxalq maliyyə hesabatları standartları üzrə təlimdə Nəqliyyat Nazirliyi, "Azəryolservis" ASC, "Azərsu" ASC, Azərbaycan Meliorasiya və Su Təsərrüfatı ASC, Azərbaycan Dövlət Dəmir Yolları QSC və digər nazirlik, dövlət qurumlarının seçilmiş təcrübəli mühasibləri,maliyyə mütəxəssisləri iştirak edirlər. Təlim kursunun müddəti  dörd aydır. Bu təlim kursu benefisiar təşkilatların təklifləri əsasında layihənin icra müddəti ərzində davamlı olaraq keçiriləcəkdir.

   Tədbiri GRBS şirkətinin idarəedici direktoru Bəhram Qurbanov açaraq rəhbərlik etdiyi təşkilatın gördüyü işlərdən,həyata keçirdiyi tədbirlərdən söz açdı. B.Qurbanov Təhsil Nazirliyi ilə qurulmuş səmərəli əməkdaşlığı yüksək dəyərləndirdi.  

Çıxış üçün söz alan Təhsil Nazirliyi  Dünya Bankı Layihələrinin  Əlaqələndirmə Qrupunun direktoru Elvin Rüstəmov "Dövlət investisiyaları üzrə kadr potensialının gücləndirilməsi layihəsi"nin əhəmiyyətinə toxunaraq onun  əsas istiqamətləri barədə ətraflı məlumat verdi. O, təlim kursunun mütəxəssislərin beynəlxalq maliyyə hesabatları standartları üzrə beynəlxalq attestasiyadan keçmələrinə imkan yaradacağını və bu sahədə kadr potensialının gücləndirilməsinə, təşkilatların iş prinsiplərinin təkmilləşdirilməsinə təkan verəcəyini dedi. Təhsil Nazirliyinin Strateji təhlil, planlaşdırma və kadrların idarəolunması şöbəsinin müdiri, "Dövlət investisiyaları üzrə kadr potensialının gücləndirilməsi layihəsi"nin milli əlaqələndiricisi Fərzəli Qədirov layihənin məqsədindən söz açaraq ona Azərbaycan hökuməti və Təhsil Nazirliyi tərəfindən çox böyük diqqət yetirildiyini  söylədi. Təhsil Nazirliyinin şöbə müdiri layihə çərçivəsində görüləcək işlərdən danışdı və sonda uğurlu nəticələrin əldə ediləcəyinə ümidvar olduğunu bildirdi.

Mərasimdən sonra qonaqlar məşğələlərdə iştirak edərək təlimin gedişini izlədilər.

Samirə KƏRİMOVA