|
Mayın 21-də Təhsil Nazirliyində "Uşaq hüquqları
üzrə pilləli tədris" layihəsinin yekunlarına
həsr olunan mərasim keçirildi.
 Qeyd
edək ki, "Uşaq hüquqları üzrə pilləli tədris"
layihəsi Təhsil Nazirliyi, Azərbaycan
Respublikasının İnsan Hüquqları üzrə Müvəkkili
(ombudsman) və BMT-nin Uşaq Fondunun
Azərbaycandakı nümayəndəliyinin təşkilatçılığı
ilə həyata keçirilib. Bu ilin əvvəlindən
reallaşdırılan layihə Bakı şəhərində pilot
olaraq seçilmiş 5, 31 və 207 nömrəli orta
məktəbləri əhatə edib.
Layihə çərçivəsində şagirdlərə uşaq hüquqları
tədris olunub. Məktəblilər özlərindən aşagı
siniflərdə təhsil alanlara mənimsədiklərini
öyrədiblər.
Tədbiri Azərbaycan Respublikasının İnsan
Hüquqları üzrə Müvəkkili (ombudsman) Elmira
Süleymanova açaraq ölkəmizdə uşaqların sağlam
böyümələri, hüquqlarının qorunması və yüksək
təhsil almaları ilə bağlı məsələlərin müvafiq
nazirlik və dövlət qurumlarının daim diqqət
mərkəzində olduğunu qeyd etdi. Elmira
Süleymanova ombudsmanın vəzifələri barədə
iştirakçılara məlumat verərək, respublikamızda
insan hüquqlarının qorunması istiqamətində
görülən işlərdən danışdı. Paytaxtın 3 orta
ümumtəhsil məktəbində reallaşdırılmış "Uşaq
hüquqları üzrə pilləli tədris" layihəsi barədə
ətraflı danışan ombudsman bildirdi ki, tədris
prosesində "Uşaq hüquqları üzrə pilləli tədrislə
bağlı seçilmiş mövzular" və "Uşaq hüquqları hamı
üçün" adlı dərs vəsaitlərindən istifadə olunub.
E.Süleymanova layihənin həyata keçirilməsində
onlara dəstək olan təhsil naziri Misir Mərdanova
öz təşəkkürünü bildirdi.
 Təhsil
naziri Misir Mərdanov "Uşaq hüquqları üzrə
pilləli tədris" layihəsinin əhəmiyyətindən söz
açaraq bunun Azərbaycan təhsilində, məktəbində
ilk addım olduğunu bildirdi.Nazir layihənin
uğurla yekunlaşdırıldığını və şagirdlərin zəruri
biliklər aldığını qeyd edərək, bu işin davamlı
olacağına ümidvar olduğunu söylədi. Ölkəmizdə
təhsil sahəsində mühüm işlərin görüldüyünü deyən
nazir Misir Mərdanov əldə olunan nəticələrdən
söz açdı.Qeyd olundu ki,ölkə başçısı cənab İlham
Əliyev tərəfindən təhsilə xüsusi diqqət və qayğı
göstərilir. Son illərdə 2000-dən çox yeni məktəb
və tədris ocaqları üçün əlavə korpuslar inşa
edilib, dərsliklər yeniləşib, təhsil
müəssisələrinin İKT ilə təminat səviyyəsi
yüksəlib. Nazir daha sonra Heydər Əliyev
Fondunun prezidenti, YUNESKO və İSESKO-nun
xoşməramlı səfiri, millət vəkili Mehriban xanım
Əliyevanın yaxından dəstəyi ilə uşaqların
sağlamlıqları, yüksək təhsil almaları üçün
yaradılan şəraitdən söz açdı, reallaşdırılan
layihələrin uğurla həyata keçirildiyini qeyd
etdi.
Nazir Misir Mərdanov çıxışının sonunda bütün
şagirdləri, müəllimləri və məktəb rəhbərlərini
təbrik edərək bildirdi ki, layihəni
müvəffəqiyyətlə həyata keçirdiklərinə görə hər 3
məktəbə Təhsil Nazirliyi tərəfindən 10 kompüter
hədiyyə verilməsi qərara alınıb. Layihə
iştirakçılarına ən xoş istəklərini çatdıran
nazir onlara nailiyyətlər arzuladı.
Ailə, Qadın və Uşaq Problemləri üzrə Dövlət
Komitəsinin sədr müavini Aynur Sofiyeva
uşaqların hüquq təhsilinə yönələn bu layihənin
əhəmiyyətindən danışdı. Ölkəmizdə uşaq
hüquqlarının qorunmasının, onların vətənpərvər
ruhda tərbiyə olunmasının dövlət uşaq
siyasətində başlıca məsələlərdən olduğunu
bildirdi.
Bakıdakı 31 nömrəli məktəbin direktoru Şükufə
Məmmədsalahova belə layihələrin təhsil
müəssisələrimizin ictimailəşməsinə yardımçı
olmaqla yanaşı, hüquqi biliklərin öyrənilməsi,
bu sahədə müəyyən təcrübə əldə edilməsi
baxımından çox səmərəli olduğunu dedi.
Azərbaycan Uşaq və Gənclərin Sülh Şəbəkəsinin
nəzdində fəaliyyət göstərən Liderlik məktəbinin
üzvləri - Bakıdakı 291 nömrəli "Ekologiya"
liseyinin IX sinif şagirdi Nicat Əkbərov, 207
nömrəli məktəbin IX sinif şagirdi Gülay Həsənova
tədbir iştirakçılarına təmsil olunduqları
təşkilatın gördüyü işlər barədə məlumat
verdilər.
Mərasimin sonunda "Uşaq hüquqları üzrə pilləli
tədris" layihəsində fərqlənən şagirdlərə
sertifikatlar və hədiyyələr, dərsin keçilməsinə
cəlb olunmuş müəllimlərə, eləcə də təşkilati
məsələlərin həllində yardımçı olmuş məktəb
direktorlarına təşəkkürnamələr təqdim olundu.
Samirə HÜSEYNQIZI |
