Dekabrın 24-də T.İsmayılov adına Uşaq-Gənclər Yaradıcılıq Sarayının "Uşaq dünyası" rəsm qalereyasında Azərbaycan Respublikasında akkreditə olunmuş xarici ölkələrin diplomatik nümayəndəliklərinin və beynəlxalq təşkilatların nümayəndəliklərinin əməkdaşlarının uşaqları arasında "Azərbaycan haqqında nə bilirəm?" mövzusunda keçirilmiş I respublika müsabiqəsinin yekununa həsr olunmuş mərasim keçirildi.

Tədbiri giriş sözü ilə təhsil nazirinin müavini Elmar Qasımov açdıqdan sonra "Cücələrim" ansamblının rəqs qrupu meydana dəvət edildi. Uşaqların ifa etdiyi rəqs mərasim iştirakçılarında xoş ovqat yaratdı.

Mərasimdə çıxış edən təhsil naziri Misir Mərdanov tədbir iştirakçılarını salamlayaraq bildirdi ki,  ilk dəfə təşkil edilən bu müsabiqə Azərbaycan Respublikası Xarici İşlər Nazirliyinin təşəbbüsü və Azərbaycan Respublikasının Təhsil Nazirliyi, Azərbaycan Respublikası Mədəniyyət və Turizm Nazirliyi, Azərbaycan Respublikası Gənclər və İdman Nazirliyi, Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə keçirilib.

Müsabiqə ölkəmizdə akkreditə olunmuş diplomatik nümayəndəliklərinin əməkdaşlarının uşaqlarında Azərbaycan tarixi, təhsili, mədəniyyəti, incəsənəti haqqında daha dolğun təsəvvür yaratmaq, onları ölkəmizin ictimai həyatında fəal iştiraka cəlb etmək məqsədi ilə təşkil olunub. Bildirildi ki, 6-18 yaşlı uşaqlar arasında inşa, şeir, rəsm, rəqs və müxtəlif əl işləri nominasiyaları üzrə keçirilmiş müsabiqədə Avropa İttifaqı nümayəndəliyi, Belarus Respublikası, Çexiya Respublikası, Koreya Respublikası, Qazaxıstan Respublikası, Pakistan İslam Respublikası, Rusiya Federasiyasının ölkəmizdəki səfirliklərinin əməkdaşlarının uşaqları iştirak ediblər. Müsabiqəyə rəsm nominasiyası üzrə 14, inşa nominasiyası üzrə 5, şeir nominasiyası üzrə 1 iş təqdim edilib.

Sonra təhsil naziri ayrı-ayrı nominasiyalar üzrə müsabiqə qaliblərinə diplom və hədiyyələr təqdim etdi. Qalibləri bir daha təbrik edən təhsil naziri gələcəkdə bu müsabiqəyə qoşulan uşaqların sayının daha da artacağına ümidini ifadə etdi.

Sonda nazir Misir Mərdanov mərasim iştirakçılarını 31 dekabr - Dünya  Azərbaycanlılarının Həmrəylik Günü və qarşıdan gələn Yeni il münasibəti ilə təbrik etdi.

Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova da qalibləri təbrik edərək bildirdi: "Əziz uşaqlar, illər keçəcək, siz Azərbaycanda qazandığınız uğuru daim xatırlayacaqsınız".

Mərasimdə xarici ölkə səfirliklərinin nümayəndələri, Təhsil Nazirliyinin əməkdaşları, Xarici İşlər Nazirliyinin idarə rəisi Əlimirzamin Əsgərov, mədəniyyət və turizm nazirinin müavini Sevda Məmmədəliyeva, gənclər və idman nazirinin müavini İntiqam Babayev və başqaları iştirak edirdilər. Mərasimin sonunda tədbir iştirakçıları qaliblərlə birlikdə xatirə şəkli çəkdirdilər. 

ƏDALƏT