Dekabrın 14-də Təhsil Nazirliyində orta məktəblərin IX-XI sinif şagirdləri və tələbələr arasında keçirilmiş "Gələcək nəsillərlə üz-üzə" III Ümumrespublika inşa müsabiqəsi qaliblərinin mükafatlandırılması mərasimi oldu.

Qeyd edək ki, inşa müsabiqəsi Azərbaycan Respublikası Təhsil Nazirliyi, Rabitə və İnformasiya Texnologiyaları Nazirliyi, Gənclər və İdman Nazirliyi, Ailə, Qadın və Uşaq Problemləri üzrə Dövlət Komitəsi və "Minilliyin Layihəsi"nin Azərbaycan Bölməsi - Azərbaycan Futuroloqlar Cəmiyyətinin birgə təşkilatçılığı ilə keçirilib.

Mərasimdə adıçəkilən qurumların rəhbərləri, "Qlobal Minillik Prizi" beynəlxalq müsabiqəsinin təsisçisi və prezidenti, "Minilliyin Layihəsi"nin Meksika üzrə bölməsinin rəhbəri Konsepsion Olavarrieta, millət vəkilləri, Təhsil Nazirliyinin məsul şəxsləri, ali məktəblərin rektorları, tanınmış alim və ziyalılar, məktəb direktorları, müəllimlər, valideynlər və KİV təmsilçiləri iştirak edirdilər.

Tədbiri giriş sözü ilə açan təhsil naziri Misir Mərdanov iştirakçıları salamladı və bu layihənin həyata keçirilməsində bir neçə dövlət qurumunun, ictimai təşkilatın xüsusi rolu olduğunu qeyd edərək onlara öz təşəkkürünü bildirdi.

"Gələcək nəsillərlə üz-üzə" III Ümumrespublika inşa müsabiqəsi ilə bağlı məlumat verən təhsil naziri diqqətə çatdırdı ki, ötən illərdən fərqli olaraq  bu il müsabiqədə orta məktəblərin IX-XI sinif şagirdləri ilə yanaşı, tələbələr də iştirak edib. Müsabiqəyə təqdim edilən inşa yazıları "Minilliyin Layihəsi"nin 15 Qlobal Çağırışına uyğun olaraq 15 mövzunu əhatə etmiş və bu mövzuların seçimi sərbəst olmuşdur.

İnşa yazıların münsiflər heyəti tərəfindən qiymətləndirilməsi nəticəsində bu il 657 şagird və 423 tələbə mükafata layiq yerlər uğrunda mübarizə aparmış, onların arasından 37 nəfəri şagird, 21 nəfəri isə tələbə olmaqla cəmi 58 finalçı seçilmişdir.

Müsabiqədə paytaxtla yanaşı, ölkəmizin ayrı-ayrı bölgələrində təhsil alan şagird və tələbələrin iştirakını fərəhləndirici hal kimi dəyərləndirən Misir Mərdanov bildirdi ki, Bakı şəhərindən 10, Sumqayıtdan 5, İsmayıllıdan 4, Zərdab, Ağdam və Hacıqabuldan 2, Quba, Tərtər, Qax, Zaqatala, Neftçala, Lənkəran, Ağcabədi, İmişli, Kürdəmir və Şamaxıdan 1 nəfər şagird qaliblər sırasında yer tutub.

Tələbə finalçılardan Azərbaycan Dövlət İqtisad Universitetindən 5, Bakı Slavyan Universitetindən 3, Azərbaycan Dillər Universitetindən 2, Azərbaycan Müəllimlər İnstitutu, onun Qazax və Ağcabədi filialları, Gəncə Dövlət Universiteti, Azərbaycan Dövlət Pedaqoji Universiteti, Azərbaycan Tibb Universiteti, Milli Aviasiya Akademiyası, Naxçıvan Müəllimlər İnstitutu, Azərbaycan Dövlət Mədəniyyət və İncəsənət Universiteti, Azərbaycan Texnologiya Universiteti və Xəzər Universitetindən isə 1 iştirakçı qalib adını qazanmışdır.

Təhsil naziri çıxışının sonunda müsabiqə qaliblərini təbrik edərək onlara gələcəkdə yeni-yeni uğurlar arzuladı.

Sonra çıxış üçün söz Azərbaycan Futuroloqlar Cəmiyyətinin sədri Reyhan Hüseynovaya verildi. Öncə rəhbərlik etdiyi qurum haqqında məlumat verən R.Hüseynova bildirdi ki, Azərbaycan Futuroloqlar Cəmiyyəti "Minilliyin Layihəsi"nin 2006-cı ildə ölkəmiz üzrə açılmış 29-cu bölməsidir. Ötən 4 il ərzində bu beynəlxalq təşkilatın dünya üzrə daha 10 bölməsi fəaliyyətə başlamışdır. Daha sonra "Gələcək nəsillərlə üz-üzə" inşa müsabiqəsi haqqında danışan natiq qeyd etdi ki, bu "Minilliyin Layihəsi"nin 15 Qlobal Çağırışı üzrə hər il Meksikada keçirilən "Qlobal Minillik Prizi" beynəlxalq müsabiqəsinin milli mərhələsidir. Ümumrespublika mərhələsinin finalçıları və qalibləri beynəlxalq mərhələyə getmək imkanı qazanırlar.

15 Qlobal Çağırış üzrə təşkil edilən inşa müsabiqəsinin əsas məqsədi qlobal dəyişikliklərdən irəli gələn tələblərə uyğunlaşmaqla sağlam və münaqişəsiz gələcəyin qorunub saxlanması və daha da yaxşılaşdırılması üçün gənclərin müvafiq tərzdə tərbiyə edilməsi, qloballaşma şəraitində inkişaf edən Azərbaycan gənclərinin dünyada baş verən müxtəlif proseslərin bir-biri ilə əlaqəli olduğunu və bunun özlərinin gələcəyinə təsir edəcəyini başa düşməsidir.

R.Hüseynova hərtərəfli dəstək üçün müvafiq dövlət qurumlarına təşəkkürünü bildirərək azərbaycanlı gəncləri belə tədbirlərdə daha fəal iştirak etməyə səslədi.

Sonra ötən illərdə Meksikada keçirilmiş təntənəli mükafatlandırma mərasimlərindən hazırlanmış videosüjet nümayiş etdirildi.

Tədbirdə çıxış edən rabitə və informasiya texnologiyaları naziri Əli Abbasov, Milli Məclisin İnsan hüquqları komitəsinin sədri Rəbiyyət Aslanova, "Qlobal Minillik Prizi" beynəlxalq müsabiqəsinin təsisçisi və prezidenti, "Minilliyin Layihəsi"nin Meksika üzrə bölməsinin rəhbəri Konsepsion Olavarrieta belə müsabiqələrin yüksək intellektə malik gənclərin yaradıcılıq qabiliyyətlərinin inkişaf etdirilməsində önəmli rolundan söz açdılar.

Mərasimin sonunda müsabiqə qaliblərinə diplom və hədiyyələr təqdim olundu. Qaliblər adından çıxış edənlər ölkəmizdə gənclərə göstərilən xüsusi diqqət və qayğıya görə təşəkkürlərini bildirdilər. 

Hicran ƏKBƏROVA