Dekabrın 9-da Bakıdakı 147 nömrəli texniki humanitar liseydə Azərbaycanın vətənpərvər oğlu,  Milli Qəhrəman Mübariz İbrahimova həsr olunmuş "Vətən mənə oğul desə... "adlı tədbir keçirildi. Liseyin şagirdlərinin ifasında Dövlət himninin oxunması ilə başlayan gecədə təhsil ocağının direktoru Həlimə Mehdiyeva  vətənpərvərlik mövzusuna həsr olunmuş tədbirin mahiyyəti haqqında iştirakçılara  məlumat verdi.

Gecənin aparıcıları liseyin IX sinif şagirdləri düşmənlə döyüşdə  igidlik göstərmiş, xalqımızın fəxri Mübariz İbrahimovun həyatından və qəhrəmanlığından danışdılar. Bildirdilər ki, bu gün adı dillər əzbəri olan, haqqında kitablar, şeirlər, mahnılar yazılan, filmlər çəkilən Azərbaycanın Milli Qəhrəmanı Mübariz İbrahimovun xatirəsi xalqımızın yaddaşında əbədi yaşayacaq.

Liseyin şagirdləri Mübariz İbrahimova həsr olunan şeirlər söylədilər.

Tədbirdə iştirak edən Xətai Rayon İcra Hakimiyyəti başçısının müavini İ.Əliyev belə tədbirlərin təhsil ocaqlarında keçirilməsini təqdirəlayiq hal   kimi qiymətləndirdi, gecənin yüksək səviyyədə  hazırlanmasından məmnun qaldığını bildirdi.

Tədbir Milli Qəhrəman Mübariz İbrahimova həsr olunmuş  filmin nümayişi ilə  başa çatdı. 

Rəşad ZİYADOV